कुंभारगाव (ता. पाटण) येथील बाळासाहेब देसाई सहकारी साखर कारखाना, मरळीचे माजी चेअरमन व विद्यमान संचालक कै. डॉ. दिलीपराव बापुराव चव्हाण यांचे वयाच्या ७१ व्या वर्षी अकस्मात निधन झाले. त्यांच्या निधनाने पाटण तालुक्यासह संपूर्ण परिसरात शोककळा पसरली आहे.
आज सोमवार दिनांक २० एप्रिल २०२६ रोजी दुपारी १२.३० वाजता कुंभारगाव येथील वैकुंठधाम येथे त्यांच्यावर शोकाकुल वातावरणात अंत्यसंस्कार करण्यात आले. यावेळी सातारा जिल्ह्याचे पालकमंत्री , शंभूराजे देसाई साहेब ,यशराज (दादा) देसाई, रविराज देसाई, कारखान्याचे चेअरमन, व्हाईस चेअरमन, संचालक मंडळ, विविध क्षेत्रातील पदाधिकारी, जिल्हा परिषद व पंचायत समिती सदस्य तसेच ग्रामस्थ मोठ्या संख्येने उपस्थित राहून त्यांनी श्रद्धांजली अर्पण केली.
कै. डॉ. दिलीपराव चव्हाण हे केवळ एक राजकीय कार्यकर्ते नव्हते, तर देसाई गटाचे खंबीर आधारस्तंभ होते. गट अडचणीत असताना त्यांनी नेहमीच धीर देत योग्य मार्गदर्शन केले.पाटण तालुक्यातील कुंभारगाव–ढेबेवाडी परिसरात त्यांनी तळागाळातील शेवटच्या माणसापर्यंत साहेबांचा विचार पोहोचवण्याचे काम प्रामाणिकपणे केले.
यावेळी पालकमंत्री यांनी आपल्या भावना व्यक्त करताना सांगितले की,
"डॉ. चव्हाण हे दिलेल्या शब्दाचे पक्के होते. त्यांचा शब्द म्हणजे अंतिम निर्णय असायचा. तालुक्यातील प्रत्येक कार्यकर्त्याची त्यांना अचूक माहिती होती. ते फक्त सहकारी नव्हते, तर माझे डोळे आणि कान होते."
त्यांनी पुढे सांगितले की, राजकीय आयुष्यातील अनेक चढ-उतारांत डॉ. चव्हाण यांनी तानाजी मालुसरे यांच्या ढालीप्रमाणे निष्ठेने साथ दिली. त्यांच्या जाण्याने देसाई गटाच्या निष्ठावंत फौजेचे कधीही न भरून येणारे नुकसान झाले आहे.
संयमी, अभ्यासू आणि परखड नेतृत्वाची ओळख असलेले डॉ. चव्हाण यांच्या अकाली जाण्याने सर्वांनाच धक्का बसला आहे. त्यांच्या अचानक झालेल्या एक्झिटने संपूर्ण तालुका हळहळ व्यक्त करत आहे.
त्यांच्या पश्चात पत्नी, दोन मुले, बहिण, भावजय, सुना व नातवंडे असा मोठा परिवार आहे.
📍 बुधवार दिनांक २२ एप्रिल २०२६ रोजी सकाळी ९ वाजता कुंभारगाव येथील वैकुंठधाम येथे त्यांचे रक्षाविसर्जन करण्यात येणार आहे.
भावपूर्ण श्रद्धांजली 💐💐💐
उत्तर द्याहटवा