*दिवाळीच्या मंगलपर्वावर पवारवाडीत भगव्या ध्वजाचा दिमाखदार सोहळा!*

मान्यवरांच्या हस्ते ध्वजारोहण; हिंदू संस्कृती, परंपरा आणि सामाजिक एकतेचा दिला संदेश

पवारवाडी, धामणी ता. पाटण : दिवाळीच्या मंगलमय पर्वाचे औचित्य साधत पवारवाडी येथे भगव्या ध्वजाचे दिमाखदार ध्वजारोहण मोठ्या उत्साहात आणि भक्तिमय वातावरणात संपन्न झाले. भगवा ध्वज, उत्साही तरुणाई आणि ग्रामस्थांची उपस्थिती यामुळे संपूर्ण परिसरात उत्साहाचे वातावरण निर्माण झाले होते.

या कार्यक्रमात भारतीय मराठा संघ, महाराष्ट्र राज्याचे संस्थापक अध्यक्ष मा. श्री. अविनाश पवार दादा, पवारवाडीचे सरपंच मा. श्री. अंकुश पाटील आणि मा. श्री. लालासो चव्हाण सर यांच्या शुभहस्ते भगव्या ध्वजाचे ध्वजारोहण करण्यात आले.

यावेळी उपस्थित मान्यवरांनी भगव्या ध्वजाचे ऐतिहासिक आणि सांस्कृतिक महत्त्व विशद केले. हिंदू संस्कृती व परंपरांचे जतन, सामाजिक सलोखा, गावातील एकोपा आणि विकासासाठी तरुणांनी संघटित होऊन पुढाकार घेण्याचे आवाहन केले. समाजहिताच्या उपक्रमांमध्ये युवकांचा सहभाग वाढणे ही काळाची गरज असल्याचेही मत व्यक्त करण्यात आले.

या सोहळ्याला श्रीरंग पवार, सागर पवार, स्वयम लोहार, शिवाजी पवार, शैलेश पवार, रविराज लोहार, विशाल पवार, पंकज पवार, प्रशांत पवार, रविराज पवार, सुशांत देसाई, विक्रम सुतार, अंकित पवार, तुषार पवार, पवन लोहार, अथर्व पवार, सार्थक पवार आणि स्वराज पाटील यांच्यासह गावातील ज्येष्ठ नागरिक, मान्यवर आणि तरुण कार्यकर्ते मोठ्या संख्येने उपस्थित होते.

दिवाळीच्या प्रकाशपर्वात पार पडलेल्या या ध्वजारोहण सोहळ्याने पवारवाडीच्या सामाजिक आणि सांस्कृतिक एकोप्याचे दर्शन घडविले. भगव्या ध्वजाच्या माध्यमातून संस्कृती, परंपरा, स्वाभिमान आणि एकतेचा संदेश देणारा हा उपक्रम ग्रामस्थांसाठी आनंदाचा आणि अभिमानाचा क्षण ठरला.

*शेतकऱ्यांच्या सुख-दुःखात सहभागी होत पालकमंत्र्यांची शेतातच दिवाळी साजरी!* *पाच हजारांची अग्रिम मदत ही अंतिम नसून पंचनाम्यानंतर निकषांनुसार पूर्ण मदत देणार – पालकमंत्री शंभूराज देसाई* ▪️ *घोंगड्यावर बैठक, शेतकऱ्यांसोबत फराळ अन् संवाद;*

*शेतकऱ्यांच्या सुख-दुःखात सहभागी होत पालकमंत्र्यांची शेतातच दिवाळी साजरी!*

 *पाच हजारांची अग्रिम मदत ही अंतिम नसून पंचनाम्यानंतर निकषांनुसार पूर्ण मदत देणार – पालकमंत्री शंभूराज देसाई*

 ▪️ *घोंगड्यावर बैठक, शेतकऱ्यांसोबत फराळ अन् संवाद;*

सातारा दि ८ : दिवाळी म्हणजे आनंदाचा, उत्साहाचा आणि मांगल्याचा सण! मात्र निसर्गाच्या अवकृपेने संकटात सापडलेल्या शेतकऱ्यांच्या आयुष्यात यंदा या सणाचा आनंद काहीसा हिरावला गेला आहे. शेतात राबवलेले कष्ट, डोळ्यांत साठवलेली स्वप्ने आणि पिकांच्या रूपाने उभी केलेली आशा निसर्गाच्या संकटाने उद्ध्वस्त झाली. या शेतकऱ्यांच्या दुःखात सहभागी होत त्यांच्या चेहऱ्यावर हास्य फुलविण्यासाठी पालकमंत्री शंभूराज देसाई यांनी थेट शेताच्या बांधावरच दिवाळी साजरी केली. शेतकऱ्यांना दिल्या जाणाऱ्या पाच हजार रुपयांच्या अग्रिम मदतीबाबत बोलताना पालकमंत्री श्री देसाई म्हणाले, पाच हजार रुपयांची मदत ही शेतकऱ्यांची दिवाळी गोड व्हावी, त्यांना सणाच्या काळात काहीसा दिलासा मिळावा, या उद्देशाने देण्यात येत आहे. ही अंतिम मदत नाही. नुकसानीचे पंचनामे पूर्ण झाल्यानंतर त्यांचे अहवाल प्राप्त होतील. त्यानंतर शासनाच्या निकषांनुसार शेतकऱ्यांना पूर्ण मदत देण्यात येईल.

माण तालुक्यातील पिंपरी गावात आज एक आगळेवेगळे आणि माणुसकीचा संदेश देणारे चित्र पाहायला मिळाले. कोणताही औपचारिक मंच नाही, मानपानाचा बडेजाव नाही, तर शेतातील मातीवर अंथरलेल्या घोंगड्यावर पालकमंत्री शेतकऱ्यांसोबत बसले होते. सोबतीला गावातील शेतकरी, समोर दिवाळीचा फराळ आणि मनमोकळा संवाद! निमित्त होते दुष्काळग्रस्त भागातील शेतकऱ्यांसोबत दिवाळीचा आनंद वाटून घेण्यासाठी आयोजित केलेल्या फराळाच्या कार्यक्रमाचे.आयोजन करण्यात आले होते.

यावेळी पालकमंत्री शंभूराज देसाई यांनी शेतकऱ्यांशी संवाद साधत त्यांच्या अडचणी जाणून घेतल्या. संकट कितीही मोठे असले तरी खचून जाऊ नका, धीर सोडू नका, असा विश्वास त्यांनी शेतकऱ्यांना दिला. आपणही यंदा साध्या पद्धतीने दिवाळी साजरी केली असून, संकटाच्या काळात शेतकऱ्यांच्या सोबत उभे राहणे हीच खरी आपुलकी असल्याची भावना त्यांनी व्यक्त केली.

‘सरकार शेतकऱ्यांच्या पाठीशी ठामपणे उभे आहे,’ असा विश्वास देताना मुख्यमंत्री देवेंद्र फडणवीस आणि  उपमुख्यमंत्री एकनाथ शिंदे उपमुख्यमंत्री सुनेत्रा अजित पवार शेतकऱ्यांच्या पाठीशी असल्याचे त्यांनी सांगितले. शेतकऱ्यांनी निसर्गाच्या संकटामुळे खचून न जाता पुन्हा नव्या उमेदीने उभे राहावे, असे आवाहनही त्यांनी केले.

शेतकऱ्यांच्या आयुष्यातील अंधार दूर करून त्यांच्या घरात पुन्हा सुखाचे दीप उजळावेत, त्यांच्या कष्टांना दिलासा मिळावा आणि संकटाशी सामना करण्यासाठी त्यांना नवे बळ मिळावे, या भावनेतून झालेला हा दिवाळी फराळाचा कार्यक्रम शेतकऱ्यांसाठी केवळ सणाचा सोहळा नव्हता, तर संकटाच्या काळात आपण एकटे नाही, आपल्या पाठीशी कोणीतरी उभे आहे, ही जाणीव करून देणारा क्षण होता.

यावेळी निवासी उपजिल्हाधिकारी नागेश पाटील, शेखर गोरे यांच्यासह पिंपरी गावातील ग्रामस्थ आणि शेतकरी मोठ्या संख्येने उपस्थित होते.

दिवाळीच्या प्रकाशात आशेचा नवा किरण! संकटाच्या काळात शेतकऱ्यांच्या बांधावर जाऊन त्यांच्यासोबत फराळाचा घास घेणे, त्यांच्या व्यथा ऐकणे आणि मदतीचा विश्वास देणे, या कृतीतून यंदाच्या दिवाळीत माणुसकीच्या नात्याचा दिवा अधिक तेजाने उजळल्याचे चित्र पिंपरी गावात पाहायला मिळाले.

प्राथमिक आरोग्य केंद्राच्या माध्यमातून नागरिकांना मिळणाऱ्या आरोग्य सुविधा अधिक दर्जेदार व प्रभावी करण्याच्या दृष्टीने हेळगाव .येथे जनआरोग्य समितीची बैठक उत्साहात पार पडली.

सदर बैठकीस जिल्हा परिषद सदस्य लालासाहेब जगदाळे व विविध गावचे सरपंच जन आरोग्य 

समितीचे सदस्य व   हेळगाव प्राथमिक आरोग्य केंद्राचे  वैद्यकीय अधिकारी डॉ. अरुण जाधव, डॉ. क्षितिजा पाटील यांच्यासह आरोग्य कर्मचारी आणि ग्रामस्थ उपस्थित होते.

बैठकीत प्राथमिक आरोग्य केंद्राच्या कामकाजाचा आणि नागरिकांना पुरविण्यात येणाऱ्या आरोग्य सुविधांचा सविस्तर आढावा घेण्यात आला. मागील बैठकीच्या इतिवृत्तावर चर्चा करून त्यातील विषयांचा पाठपुरावा करण्यात आला. तसेच आरोग्य केंद्रातील उपलब्ध औषधसाठा, स्वच्छता, रुग्णांना मिळणाऱ्या सुविधा, उपक्रम अडचणी यांवर चर्चा झाली. आरोग्यविषयक विविध आणि केंद्रासमोरील

ग्रामीण भागातील ग्रामस्थांना वेळेत आणि गुणवत्तापूर्ण आरोग्य

सेवा मिळणे आवश्यक असल्याचे मत यावेळी व्यक्त करण्यात आले. आरोग्य केंद्रातील समस्या मार्गी लावून उपलब्ध सुविधांचा अधिक प्रभावी वापर करण्याबरोबरच आरोग्य सेवा शेवटच्या घटकापर्यंत पोहोचविण्यासाठी अधिकारी, कर्मचारी आणि समिती सदस्यांनी समन्वयाने काम करण्यावर भर देण्यात आला.

 एच पी व्ही लसीकरणाबाबत श्रीकांत पाटील यांनी प्राथमिक आरोग्य केंद्र हेळगावचे अभिनंदन करण्याचा प्रस्ताव मांडला तसेच क्षय रुग्णांना माननीय जिल्हा परिषद सदस्य आरोग्य समिती  सदस्य सातारा लालासाहेब जगदाळे व जन आरोग्य समितीचे सदस्य  यांच्या हस्ते फूड बस्केट देण्यात आले 

 

 तेव्हा उपस्थित विविध गावचे सरपंच तसेच जन आरोग्य समितीचे सदस्य व आरोग्य कर्मचारी उपस्थित होते तेव्हा आरोग्य सहाय्यक आरोग्य सहायिका आरोग्य सेव्य सेविका आरोग्य सेवक सेविका औषध निर्माण अधिकारी प्रयोगशाळा तंत्रज्ञ तसेच आशा गटप्रवर्तक उपस्थित होते 

 राजू बानगुडे यांनी उपस्थितांचे स्वागत करून, आभार मानले

*ऊस दराच्या प्रश्नावर तोडगा काढण्यासाठी पालकमंत्री शंभूराज देसाई यांच्या अध्यक्षतेखाली बैठक संपन्न*

सातारा दि.७  { साप्ताहिक कुमजाई पर्व न्युज } - सातारा जिल्ह्यातील काही कारखान्यांचे आणि सांगली जिल्ह्यातील काही कारखान्याचे कार्यक्षेत्र एकच असल्याने सांगली जिल्ह्यातील कारखान्यांनी अंतिम दर जाहीर केल्यानंतर सातारा जिल्ह्यातील कारखान्याच्या बोर्ड मीटिंग होऊन अंतिम दर्जा अंतिम दर जाहीर केला जाईल अशी चर्चा आज जिल्ह्यातील  ऊस दरासंबंधि पालकमंत्री शंभूराज देसाई यांच्या अध्यक्षतेखाली संपन्न झालेल्या बैठकीत करण्यात आली. 

बैठकीस सार्वजनिक बांधकाम मंत्री श्रीमंत छत्रपती शिवेंद्रसिंहराजे भोसले आमदार अतुल भोसले यांच्यासह जिल्ह्यातील कारखान्यांचे अध्यक्ष व व्यवस्थापकीय संचालक यासह बँकेचे संचालक उपस्थित होते. 

 साताऱ्यातील उसाचे दर ठरवताना सातारा जिल्ह्यामध्ये रिकवरी झोन दोन ठरवण्यात ठरवावेत ज्यामध्ये   11 ते 12 टक्के आणि 12 टक्के पेक्षा जास्त रिकव्हरी असणारा असे दोन झो न ठरवावेत आणि त्यानुसार दर निश्चित करावे अशा सूचना पालकमंत्री श्री देसाई यांनी यावेळी केल्या. पालकमंत्री यांच्या या सूचनांना सर्वांनी सकारात्मक प्रतिसाद दिला तसेच जिल्ह्यातील सर्व कारखान्यांसोबत ऊसदराचे विषयी सकारात्मक चर्चा करण्यात आली.

महिला बचत गटांच्या महिलांना दिवाळी साहित्य किटचे वाटप; हळदी-कुंकू समारंभ उत्साहात संपन्न!चोरगेवाडी-पडवळवाडी येथील श्री गणेश व श्री बेलजाई देवी महिला बचत गटांचा स्तुत्य उपक्रम.

प्रतिनिधी - राजेंद्र पुजारी कुंभारगाव : ग्रामीण भागातील महिलांना आर्थिकदृष्ट्या सक्षम करून स्वावलंबनाच्या दिशेने वाटचाल करण्यासाठी महिला बचत गट महत्त्वाची भूमिका बजावत आहेत. याच सामाजिक बांधिलकीतून कुंभारगाव (ता. पाटण) येथील चोरगेवाडी व पडवळवाडी परिसरातील श्री गणेश स्वयंसहाय्यता महिला बचत गट आणि श्री बेलजाई देवी स्वयंसहाय्यता महिला बचत गट यांच्या संयुक्त विद्यमाने हळदी-कुंकू समारंभ व दिवाळी साहित्य किट वाटपाचा कार्यक्रम रविवार, दि. १ नोव्हेंबर २०२६ रोजी श्री बेलजाई देवी मंदिराच्या प्रांगणात उत्साहपूर्ण वातावरणात संपन्न झाला.

या कार्यक्रमाच्या व्यासपीठावर जय हिंद महिला प्रभाग संघ, काळगावच्या प्रभाग व्यवस्थापक सौ. प्रियंका प्रशांत डुबल, सीआरपी सौ. अश्विनी कोकाटे, कार्यक्रमाचे प्रमुख पाहुणे सातारा जिल्हा पोलीस पाटील संघटनेचे अध्यक्ष तथा पोलीस पाटील अमित शिंदे, शिवाजी घाडगे तसेच स्पंदन एक्सप्रेसचे प्रतिनिधी राजेंद्र पुजारी उपस्थित होते.

यावेळी उपस्थित महिलांना मार्गदर्शन करताना प्रमुख पाहुणे पोलीस पाटील अमित शिंदे म्हणाले की, ग्रामीण व आर्थिकदृष्ट्या दुर्बल घटकांतील महिलांना आर्थिक आणि सामाजिकदृष्ट्या स्वावलंबी बनविणे हा महिला बचत गट स्थापनेमागील मुख्य उद्देश आहे. महिलांमध्ये नियमित बचतीची सवय निर्माण करणे, गरजेच्या वेळी कमी व्याजदराने कर्ज उपलब्ध करून देणे आणि सावकारांच्या कर्जाच्या विळख्यातून महिलांची सुटका करणे यामध्ये बचत गटांची महत्त्वपूर्ण भूमिका आहे.

बचत गटांच्या माध्यमातून महिलांना लघुउद्योग, शेतीपूरक व्यवसाय आणि स्वयंरोजगाराच्या संधी उपलब्ध होतात. त्यामुळे कुटुंबाच्या आर्थिक उत्पन्नात वाढ होण्यास मदत होते. महिलांना आर्थिक निर्णय प्रक्रियेत सहभागी करून घेणे, त्यांचा आत्मविश्वास वाढविणे, कौशल्य विकास, व्यवसाय व्यवस्थापन तसेच तांत्रिक व व्यावहारिक प्रशिक्षण देणे हीदेखील बचत गटांची महत्त्वाची उद्दिष्टे आहेत.

महिलांनी एकत्र येऊन नियमित बचत करणे, अंतर्गत कर्जवाटप करताना पारदर्शकता राखणे आणि आर्थिक शिस्त पाळणे आवश्यक आहे. सामाजिक प्रश्न असोत किंवा आपत्कालीन परिस्थिती, अशा वेळी बचत गटातील महिलांनी एकमेकींच्या पाठीशी उभे राहून सामूहिक शक्ती वाढवावी. या माध्यमातून महिलांना समाजात सन्मानाचे स्थान मिळण्यास मदत होते, असेही त्यांनी नमूद केले.

दरम्यान, श्री गणेश स्वयंसहाय्यता महिला बचत गट व श्री बेलजाई देवी स्वयंसहाय्यता महिला बचत गट यांच्या संयुक्त विद्यमाने आयोजित करण्यात आलेला हा दिवाळी साहित्य किट वाटप व हळदी-कुंकू समारंभ महिलांसाठी आनंददायी ठरला. यावेळी बचत गटातील महिलांना दिवाळीनिमित्त साहित्य किटचे वाटप करण्यात आले. तसेच उपस्थित सर्व महिलांसाठी स्नेहभोजनाचे आयोजन करण्यात आले होते.

महिलांच्या एकजुटीला प्रोत्साहन देणारा, आर्थिक स्वावलंबनाचा संदेश देणारा आणि सणासुदीच्या काळात आनंदाची देवाणघेवाण घडवून आणणारा हा उपक्रम निश्चितच कौतुकास्पद असून भविष्यात इतर महिला बचत गटांसाठी प्रेरणादायी ठरेल, अशी भावना यावेळी व्यक्त करण्यात आली.

हा कार्यक्रम यशस्वी करण्यासाठी विकास नागरी पतसंस्था, तळमावले शाखेचे व्यवस्थापक आनंदा चोरगे (साहेब), बाळासो चोरगे, अशोक विठ्ठल चोरगे, रामचंद्र गणपत वाघ, चंद्रकांत यशवंत चोरगे, खाशाबा विठ्ठल चोरगे, योगेश खाशाबा वाघ, महेश मारुती भातभके यांच्यासह ग्रामस्थांनी विशेष परिश्रम घेतले.

कार्यक्रमाचे सूत्रसंचालन व आभार प्रदर्शन महेश दिलवाले यांनी केले.

नशामुक्त भारताचा संदेश देण्यासाठी ढेबेवाडीत विद्यार्थ्यांची जनजागृती रॅली!ढेबेवाडी पोलीस ठाणे व कर्मवीर भाऊराव पाटील विद्यालयाचा संयुक्त उपक्रम;

नशामुक्त भारताचा संदेश देण्यासाठी ढेबेवाडीत विद्यार्थ्यांची जनजागृती रॅली!

ढेबेवाडी पोलीस ठाणे व कर्मवीर भाऊराव पाटील विद्यालयाचा संयुक्त उपक्रम; १५० ते २०० विद्यार्थ्यांचा उत्स्फूर्त सहभाग

ढेबेवाडी : नशामुक्त भारत सप्ताह २०२६ च्या अनुषंगाने व्यसनमुक्त समाजनिर्मितीचा संदेश जनसामान्यांपर्यंत पोहोचवण्यासाठी ढेबेवाडी पोलीस ठाणे आणि कर्मवीर भाऊराव पाटील विद्यालय, ढेबेवाडी यांच्या संयुक्त विद्यमाने जनजागृती रॅलीचे आयोजन करण्यात आले. या रॅलीत विद्यालयातील पाचवी ते दहावीच्या विद्यार्थ्यांनी उत्स्फूर्त सहभाग नोंदवत व्यसनमुक्त भारताचा संदेश दिला.

आजच्या काळात व्यसनाधीनतेची समस्या समाजासमोर मोठे आव्हान बनली आहे. विशेषतः तरुण पिढीला व्यसनांपासून दूर ठेवणे, व्यसनांचे दुष्परिणाम समजावून सांगणे आणि निरोगी जीवनशैलीचे महत्त्व पटवून देणे आवश्यक आहे. याच उद्देशाने नशामुक्त भारत सप्ताह २०२६ अंतर्गत या जनजागृती रॅलीचे आयोजन करण्यात आले.

या रॅलीच्या माध्यमातून व्यसनमुक्त जीवनाचा स्वीकार करावा, अमली पदार्थ व इतर व्यसनांपासून दूर राहावे आणि समाजात व्यसनमुक्तीबाबत जागरूकता निर्माण करावी, असा संदेश देण्यात आला.

कर्मवीर भाऊराव पाटील विद्यालय, ढेबेवाडी येथून रॅलीला सुरुवात झाली. त्यानंतर मरीआई मंदिर, ढेबेवाडी, ढेबेवाडी बाजारपेठ, झेंडा चौक आणि एसटी स्टँड या मार्गावरून रॅली काढण्यात आली. या रॅलीमुळे परिसरात नशामुक्त भारताचा संदेश पोहोचविण्यास मदत झाली.

या उपक्रमात विद्यालयातील पाचवी ते दहावीच्या सुमारे १५० ते २०० विद्यार्थ्यांनी सहभाग घेतला. तसेच विद्यालयातील पाच शिक्षक आणि ढेबेवाडी पोलीस ठाण्यातील एक पोलीस अधिकारी व सात पोलीस अंमलदार सहभागी झाले होते.

विद्यार्थ्यांच्या माध्यमातून व्यसनमुक्तीचा संदेश समाजाच्या विविध घटकांपर्यंत पोहोचवणे हा या उपक्रमाचा महत्त्वाचा उद्देश होता. पोलीस विभाग आणि शैक्षणिक संस्थांनी एकत्र येऊन राबविलेल्या या उपक्रमातून व्यसनमुक्त समाजनिर्मितीसाठी जनजागृतीचे महत्त्व अधोरेखित झाले.

सदर रॅली दुपारी १.३० ते २.१५ या वेळेत पार पडली. नशामुक्त भारत सप्ताह २०२६ अंतर्गत राबविण्यात आलेल्या या उपक्रमातून विद्यार्थ्यांमध्ये व्यसनांविषयी जागरूकता निर्माण करण्यासह नागरिकांनाही व्यसनमुक्त जीवनाचा संदेश देण्यात आला.

ढेबेवाडी - सराफ दुकानात भरदिवसा १० तोळे सोन्याच्या दागिन्यांची चोरी; पोलिसांकडून ४८ तासांत दोन आरोपी जेरबंद.

ढेबेवाडी -  सराफ दुकानात भरदिवसा १० तोळे सोन्याच्या दागिन्यांची चोरी; पोलिसांकडून ४८ तासांत दोन आरोपी जेरबंद.

पाटण : पाटण तालुक्यातील ढेबेवाडी येथील सराफ दुकानात भरदिवसा ग्राहक बनून आलेल्या चोरट्यांनी तब्बल १० तोळे सोन्याचे दागिने लंपास केल्याची घटना घडली होती. या गुन्ह्याचा छडा लावत ढेबेवाडी पोलिसांनी अवघ्या ४८ तासांत दोन आरोपींना अटक केली असून, त्यांच्याकडून चोरीस गेलेले सुमारे १० लाख रुपये किमतीचे सोन्याचे दागिने आणि गुन्ह्यात वापरलेली स्प्लेंडर मोटारसायकल जप्त केली आहे.

दिनांक १६ ऑक्टोबर २०२६ रोजी दुपारी सुमारे २ वाजण्याच्या सुमारास ढेबेवाडी (मंद्रुळकोळे), ता. पाटण येथील सणबुर रस्त्यालगत असलेल्या बाजारपेठेतील मगर बंधू ज्वेलर्स या दुकानात ही चोरी झाली.

दोन चोरट्यांनी दागिने खरेदी करण्याच्या बहाण्याने दुकानात प्रवेश केला. त्यांनी दुकानमालकाला वेगवेगळ्या डिझाइनचे दागिने दाखवण्यास सांगितले. दुकानमालक दागिने दाखवत असताना, त्यांचे लक्ष नसल्याची संधी साधून चोरट्यांनी दागिने हातोहात लंपास केले. त्यानंतर दुकानातून बाहेर पडून ढेबेवाडी चौकात उभी असलेल्या मोटारसायकलवरून दोघांनी घटनास्थळावरून पोबारा केला.

घटनेची माहिती मिळताच पोलिसांनी तातडीने घटनास्थळी भेट देऊन पाहणी केली. सराफ दुकानदार विनोद मगर यांनी दिलेल्या फिर्यादीवरून ढेबेवाडी पोलीस ठाण्यात भारतीय न्याय संहितेच्या कलम ३०५(अ), ३(५) अन्वये गुन्हा दाखल करण्यात आला.

 पोलिसांच्या तपासाला यश

ढेबेवाडी पोलीस ठाण्याच्या पथकाने तांत्रिक माहिती आणि गोपनीय बातमीदारांच्या मदतीने तपासाची चक्रे वेगाने फिरवली. अवघ्या ४८ तासांत पोलिसांनी दोन संशयित आरोपींना ताब्यात घेऊन अटक केली.

अटक करण्यात आलेल्या आरोपींची नावे पुढीलप्रमाणे आहेत.. अमित भिमराव पाटील (वय ३१ वर्षे), रा. आणे, ता. कराड, जि. सातारा.. रोहित नामदेव घाडगे (वय ३७ वर्षे), रा. विश्वासनगर, मलकापूर, ता. कराड, जि. सातारा.

या आरोपींकडून चोरीस गेलेले सुमारे १० लाख रुपये किमतीचे १० तोळे सोन्याचे दागिने तसेच गुन्ह्यात वापरण्यात आलेली स्प्लेंडर मोटारसायकल जप्त करण्यात आली आहे.

 वरिष्ठांच्या मार्गदर्शनाखाली तपास

या गुन्ह्याचा तपास सातारा जिल्ह्याचे पोलीस अधीक्षक मा. श्री. निखिल पिंगळे, अपर पोलीस अधीक्षक मा. वैशाली कडुकर यांच्या सूचनेनुसार तसेच पाटण विभागाचे उपविभागीय पोलीस अधिकारी श्री. सुदाम पाचोरकर यांच्या मार्गदर्शनाखाली करण्यात आला.

या कारवाईत ढेबेवाडी पोलीस ठाण्याचे पोलीस निरीक्षक प्रवीण दाईंगडे, पोलीस उपनिरीक्षक इंद्रजित चव्हाण, पोलीस हवालदार प्रशांत चव्हाण, पोलीस हवालदार नवनाथ कुंभार, पोलीस कॉन्स्टेबल प्रशांत माने, सौरभ कांबळे, माणिक पाटील, संकेत पाटील, गणेश किर्वे, उज्ज्वल कदम, माणिक थोरात, विकास पाटील तसेच सातारा येथील सायबर पोलीस ठाण्याच्या पथकाने सहभाग घेतला.

भरदिवसा झालेल्या या चोरीचा अवघ्या ४८ तासांत छडा लावून आरोपींना जेरबंद केल्याने ढेबेवाडी पोलिसांच्या कामगिरीचे कौतुक होत आहे.