धक्कादायक घटना! मलकापुरात मित्राकडूनच मित्राचा खून — दारूच्या नशेत उफाळला जुन्या वादाचा राग
मलकापूर (कुमजाई पर्व प्रतिनिधी) — मलकापुरातील रिलॅक्स बारसमोर शनिवारी मध्यरात्री धक्कादायक प्रकार घडला. दारू पिताना जुन्या वादावरून झालेल्या भांडणात मित्रानेच मित्राचा खून केल्याची घटना समोर आली आहे.
खून झालेल्याचे नाव सुदर्शन ऊर्फ राजू हणमंत चोरगे (वय २६, सध्या रा. पोळवस्ती, आगाशिवनगर, मूळ रा. गलमेवाडी,(कुंभारगाव ) ता. पाटण) असे असून, आदित्य पांडुरंग देसाई (वय २१, रा. कोल्हापूर नाका) या तरुणावर गुन्हा दाखल करण्यात आला आहे. याबाबत प्रियदर्शनी चोरगे यांनी कऱ्हाड शहर पोलिसात फिर्याद दिली आहे. पोलिसांनी तत्काळ कारवाई करत संशयित देसाईला अटक केली आहे.
पोलिसांनी दिलेल्या माहितीनुसार, शनिवारी रात्री बाराच्या सुमारास रिलॅक्स बारसमोर दोघांमध्ये वाद झाला. त्यानंतर जुन्या भांडणाचा राग मनात धरून आदित्यने कमरेला असलेल्या गुप्तीने सुदर्शनच्या पोटात व छातीवर सपासप वार केले. या घटनेत तो गंभीर जखमी झाला. त्याला तातडीने उपचारासाठी कृष्णा रुग्णालयात दाखल करण्यात आले. मात्र उपचार सुरू असतानाच आज (रविवार) सकाळी त्याचा मृत्यू झाला.
शवविच्छेदनानंतर दुपारी सुदर्शनचा मृतदेह नातेवाइकांच्या ताब्यात देण्यात आला. घटनेची माहिती मिळताच उपविभागीय पोलिस अधिकारी राजश्री पाटील, वरिष्ठ पोलिस निरीक्षक राजू ताशिलदार, तसेच सहाय्यक पोलिस निरीक्षक अशोक भापकर यांनी घटनास्थळी भेट दिली.
दरम्यान, पोलिसांनी तात्काळ तपासाची चक्रे फिरवत रात्रभर संशयिताचा शोध घेतला आणि अखेर सकाळी त्याला अटक करण्यात आली. या प्रकरणी सहाय्यक पोलिस निरीक्षक नीलेश तारू पुढील तपास करीत आहेत.
कोणत्याही टिप्पण्या नाहीत:
टिप्पणी पोस्ट करा