*🚩 मानखुर्दमध्ये २६ एप्रिलला विराट हिंदू संमेलन; एकतेचा एल्गार, हिंदू शक्तीचा प्रचंड जागर 🚩*

मुंबई (मानखुर्द) : हिंदू समाजाने आता संघटित होण्याची वेळ आली आहे, असा ठाम आणि आक्रमक संदेश देत महाराष्ट्र नगर, मानखुर्द येथे सकल हिंदू समाज आयोजन समितीच्या वतीने भव्य हिंदू संमेलनाचे आयोजन करण्यात आले आहे. धर्म, संस्कृती आणि सामाजिक एकात्मता या त्रिसूत्रीवर आधारित हे संमेलन २६ एप्रिल २०२६ रोजी सायंकाळी ६ ते ९ या वेळेत मोठ्या उत्साहात पार पडणार आहे.

महाराष्ट्र नगर परिसरातील महात्मा फुले सोसायटी जवळील न्यू इंग्लिश पब्लिक स्कूल शेजारील मैदानावर होणाऱ्या या संमेलनासाठी मोठ्या प्रमाणावर तयारी सुरू असून परिसरात उत्सुकतेचे वातावरण निर्माण झाले आहे. आयोजकांनी याला “हिंदू एकतेचा शक्तीप्रदर्शन सोहळा” असे स्वरूप दिले आहे.

संमेलनाच्या माध्यमातून हिंदू समाजातील विविध घटकांना एकत्र आणून सामाजिक सलोखा, संस्कृतीचे जतन आणि धर्मरक्षण याबाबत जागृती केली जाणार आहे. सध्याच्या बदलत्या सामाजिक आणि राजकीय परिस्थितीत हिंदू समाजाने संघटित राहणे का गरजेचे आहे, यावरही या संमेलनात ठोस मार्गदर्शन होणार असल्याची माहिती आयोजकांनी दिली.

विशेष म्हणजे, या संमेलनासाठी परिसरातील नागरिक, युवक, महिला आणि ज्येष्ठ नागरिक यांना मोठ्या संख्येने उपस्थित राहण्याचे आवाहन करण्यात आले आहे. “प्रत्येक हिंदू कुटुंबाने या संमेलनात सहभागी होणे ही काळाची गरज आहे,” असा ठाम आग्रह आयोजक समितीने व्यक्त केला आहे.

संमेलनाच्या पार्श्वभूमीवर मानखुर्द परिसरात बॅनर, पोस्टर आणि प्रचार फलकांद्वारे वातावरण तापले असून, हा कार्यक्रम केवळ धार्मिक नव्हे तर सामाजिक शक्ती एकवटण्याचा एक मोठा प्रयत्न ठरणार आहे, अशी चर्चा रंगू लागली आहे.

“एकत्र या, संघटित व्हा आणि हिंदू शक्तीचा जागर” — या घोषवाक्यासह होणारे हे संमेलन आगामी काळात मोठा सामाजिक संदेश देणार, यात शंका नाही.