मंद्रूळकोळे हादरले! रक्षा विसर्जनात मधमाश्यांचा भीषण हल्ला; १०-१२ जखमी, स्मशानभूमीत एकच खळबळ.
कुमजाई पर्व न्यूज ढेबेवाडी | प्रतिनिधी
पाटण तालुक्यातील मंद्रूळकोळे येथे रविवारी रक्षा विसर्जनाच्या कार्यक्रमावेळी मधमाश्यांच्या मोहोळाने अचानक केलेल्या हल्ल्यामुळे परिसरात भीतीचे वातावरण निर्माण झाले. शांततेत पार पडणारा धार्मिक विधी काही क्षणांतच गोंधळात बदलला आणि सुमारे १० ते १२ जण जखमी झाले.
मंद्रूळकोळे येथील रहिवासी यांच्या निधनानंतर रविवार, दि. २६ रोजी सकाळी वांग नदीकाठी रक्षा विसर्जनाचा कार्यक्रम आयोजित करण्यात आला होता. विधीपूर्व तयारीसाठी १५ ते २० ग्रामस्थ स्मशानभूमी परिसरात उपस्थित होते.
तयारी सुरू असतानाच झाडावरील मधमाश्यांचे मोठे मोहोळ अचानक भडकले आणि त्यांनी उपस्थितांवर तुफानी हल्ला चढवला. या अनपेक्षित हल्ल्यामुळे स्मशानभूमीत एकच धावपळ उडाली. स्वतःचा बचाव करण्यासाठी लोकांनी पळापळ केली. या घटनेत सुमारे १० ते १२ जणांना मधमाश्यांनी दंश केला.
जखमींना तातडीने ढेबेवाडी येथील ग्रामीण रुग्णालय तसेच काही खाजगी दवाखान्यांमध्ये दाखल करण्यात आले. डॉक्टरांनी तत्काळ उपचार केल्याने सर्वांची प्रकृती सध्या स्थिर असून त्यांना घरी सोडण्यात आले आहे.
दरम्यान, मूळ विसर्जन स्थळी धोका कायम असल्याचे लक्षात येताच कुटुंबीय आणि ग्रामस्थांनी तत्परता दाखवली. पुढील अनर्थ टाळण्यासाठी रक्षा अन्यत्र ढेबेवाडी वांग नदीकाठी नेऊन विसर्जन विधी शांततेत पार पाडण्यात आला.
कोणत्याही टिप्पण्या नाहीत:
टिप्पणी पोस्ट करा