सणबुर प्रतिनिधी – महेश जाधव
सणबुर : सर्वसामान्य नागरिकांचे प्रलंबित महसूल प्रश्न जलदगतीने सोडवण्यासाठी राबविण्यात येत असलेल्या “छत्रपती महाराजस्व व समाधान अभियान” या उपक्रमाला नागरिकांकडून उत्स्फूर्त प्रतिसाद मिळत आहे. महसूल प्रशासनाच्या सकारात्मक पुढाकारामुळे हजारो प्रकरणांचा अल्पावधीत निपटारा होत असून नागरिकांना मोठा दिलासा मिळत आहे.
या अभियानाअंतर्गत फेरफार नोंदी, डिजिटल सातबारा आणि ८-अ उतारे यांसारखी अत्यावश्यक कागदपत्रे थेट नागरिकांच्या हाती देण्यात येत आहेत. त्यामुळे नागरिकांना कार्यालयीन फेऱ्या मारण्याची गरज कमी झाली असून, पारदर्शक व जलद सेवा देण्याचा प्रशासनाचा प्रयत्न यशस्वी ठरत आहे.
👉 महत्त्वाची आकडेवारी :
▪️ फेरफार नोंदी : १,३२५ प्रलंबित प्रकरणांचा निपटारा
▪️ डिजिटल सातबारा उतारे : १३,२६५ नागरिकांना वितरण
▪️ डिजिटल ८-अ उतारे : १,८७० लाभार्थ्यांना प्रदान
▪️ शासकीय प्रमाणपत्रे : ४३४ प्रमाणपत्रांचे वितरण
या उपक्रमामुळे जमीन नोंदी, वारस हक्क, तसेच तांत्रिक अडचणींमुळे प्रलंबित असलेली अनेक कामे मार्गी लागली आहेत. प्रशासन थेट जनतेच्या दारी पोहोचल्याने वेळ व पैशाची बचत होत असून, नागरिकांच्या समाधानातही वाढ झाली आहे.
📣 नागरिकांची प्रतिक्रिया :
“सरकारी काम म्हणजे दीर्घ प्रतीक्षा, ही प्रतिमा आता बदलत आहे. एकाच ठिकाणी सातबारा, फेरफार यांसारखी कामे पूर्ण होत असल्याने मोठा दिलासा मिळाला,” अशी भावना एका लाभार्थ्याने व्यक्त केली.
डिजिटल स्वाक्षरीयुक्त सातबारा व ८-अ उताऱ्यांमुळे बँकिंग तसेच इतर कायदेशीर प्रक्रियांसाठी नागरिकांना तलाठी कार्यालयात वारंवार जाण्याची गरज उरलेली नाही. यामुळे महसूल विभागाच्या कार्यक्षमतेत लक्षणीय वाढ झाली आहे.
या अभियानाच्या यशाबद्दल समाधान व्यक्त करत उपविभागीय अधिकारी सोपान टोंपे (पाटण) आणि तहसीलदार अनंत गुरव यांनी सांगितले की, उर्वरित प्रलंबित प्रकरणेही अशाच मोहिमांद्वारे लवकरच निकाली काढली जातील.
ज्या शेतकरी खातेदारांच्या वारस नोंदी अद्याप प्रलंबित आहेत, त्यांनी तात्काळ ग्राम महसूल अधिकारी किंवा तहसील कार्यालय, पाटण येथे संपर्क साधावा. नियमानुसार प्रक्रिया पूर्ण करून संबंधित ७/१२ व ८-अ उतारे घरपोच देण्याची कार्यवाही करण्यात येणार आहे, असे तहसीलदार अनंत गुरव यांनी सांगितले आहे.
एकूणच, “छत्रपती महाराजस्व अभियान” हे महसूल प्रशासन आणि जनतेमधील दुवा मजबूत करत असून, कार्यक्षम व पारदर्शक प्रशासनाचे उत्तम उदाहरण ठरत आहे
कोणत्याही टिप्पण्या नाहीत:
टिप्पणी पोस्ट करा