कुंभारगाव - हळदीकुंकूच्या मंगल वातावरणात चिमुकल्यांचा बालबाजार फुलला कुंभारगाव जिल्हा परिषद शाळेत संस्कार, व्यवहारज्ञान आणि आनंदाचा संगम.

कुंभारगाव - हळदीकुंकूच्या मंगल वातावरणात चिमुकल्यांचा बालबाजार फुलला 

कुंभारगाव जिल्हा परिषद शाळेत संस्कार, व्यवहारज्ञान आणि आनंदाचा संगम.

कुंभारगाव, ता. पाटण येथील जिल्हा परिषद प्राथमिक केंद्र शाळा क्रमांक १ येथे महिलांसाठी हळदीकुंकू समारंभ तसेच शाळेतील चिमुकल्या विद्यार्थ्यांचा बालबाजार मोठ्या उत्साहात आणि नावीन्यपूर्ण उपक्रमांच्या माध्यमातून पार पडला. या उपक्रमामुळे शाळा, पालक आणि ग्रामस्थ यांच्यातील नातेसंबंध अधिक दृढ झाले.

कार्यक्रमाची सुरुवात क्रांतीज्योती सावित्रीबाई फुले व ज्ञानदेवता सरस्वती यांच्या प्रतिमेच्या पूजनाने करण्यात आली. यानंतर उपस्थित पालक महिलावर्गासाठी हळदीकुंकू समारंभ साजरा करण्यात आला. यावेळी मुलींच्या शाळेच्या सौ.लीना पाटील  यांनी उपस्थित पालक महिला व ग्रामस्थांना मार्गदर्शन करताना मुलांच्या सर्वांगीण विकासासाठी अशा उपक्रमांचे महत्त्व अधोरेखित केले.

यानंतर जिल्हा परिषद प्राथमिक शाळेच्या प्रशस्त पटांगणात पहिली ते चौथीपर्यंतच्या विद्यार्थ्यांनी भरवलेला चिमुकल्यांचा बालबाजार सर्वांचे लक्ष वेधून घेत होता. उपक्रमशील शाळा म्हणून ओळख असलेल्या या शाळेतील विद्यार्थ्यांनी स्वतः भाजीपाला व इतर वस्तू विक्रीसाठी मांडल्या. शिक्षक, शिक्षिका, पालक व ग्रामस्थांनी या बाजारातून खरेदी करत चिमुकल्यांना उत्स्फूर्त प्रतिसाद दिला.

या बालबाजाराच्या माध्यमातून विद्यार्थ्यांना देवाण-घेवाणीचे प्रत्यक्ष व्यवहारज्ञान मिळाले. नोटा, नाणी, रुपये-पैशांचा दैनंदिन व्यवहार, किलोग्रॅमने वजन करून वस्तू देणे, मोजमाप तसेच नफा-तोट्याची संकल्पना विद्यार्थ्यांना अनुभवातून समजली. विशेष म्हणजे या बालबाजारात तब्बल ५,५०० रुपयांची उलाढाल झाली, हे या उपक्रमाचे यश अधोरेखित करते.

या संपूर्ण उपक्रमाचे नीटनेटके आणि प्रभावी नियोजन जिल्हा परिषद शाळेच्या मुख्याध्यापिका सौ. उज्वला विकास चव्हाण यांच्या मार्गदर्शनाखाली करण्यात आले. यासाठी शिक्षिका अनुराधा शिवाजी आवळे, जिल्हा परिषद प्राथमिक शाळा मुलींच्या मुख्याध्यापिका सौ. लीना पाटील, शिक्षक सतीश सिरसे, अंगणवाडी सेविका, मदतनीस तसेच शाळा व्यवस्थापन समितीच्या सदस्यांनी मोलाचे सहकार्य करत परिश्रम घेतले.

हळदीकुंकू समारंभातून महिलांचा सन्मान आणि बालबाजारातून विद्यार्थ्यांचा व्यवहारज्ञानाचा विकास साधणारा हा उपक्रम ग्रामस्थांमध्ये विशेष चर्चेचा विषय ठरला असून जिल्हा परिषद शाळेच्या उपक्रमशीलतेचे उत्तम उदाहरण ठरला आहे.