.मानखुर्द वार्ड क्रमांक 143 मधील वेगळाच पेच “सगळेच ओळखीचे, सगळेच आपले – पण मतदान कोणाला करायचे?”

मानखुर्द वार्ड 143 - जो मतदारांचा संभ्रम दूर करेल, तोच मानखुर्दचा ‘किंगमेकर’ ठरणार! मुंबई महानगरपालिका निवडणुकीच्या प्रचारात दिवसेंदिवस अधिक तीव्रता येत असून, आता ही लढत केवळ उमेदवारांपुरती न राहता प्रतिष्ठेची आणि ताकदीची बनत चालली आहे. उमेदवार निश्चित झाल्यानंतर प्रचाराला अक्षरशः वेगाचे इंजिन लागले असून, प्रत्येक पक्षाने आपली पूर्ण यंत्रणा मैदानात उतरवली आहे. प्रचार कार्यालयांची झपाट्याने उद्घाटने, पदयात्रा, शाखा भेटी, गल्लोगल्ली सभा आणि घरोघरी संपर्क मोहिमा यामुळे संपूर्ण परिसर राजकीय हालचालींनी गजबजून गेला आहे.

🗣️ पोस्टर-बॅनरपलीकडे गेलेला प्रचार यावेळी प्रचार केवळ पोस्टर, बॅनर, फ्लेक्सपुरता मर्यादित राहिलेला नाही. उमेदवार थेट मतदारांशी संवाद साधत असून, पाणीटंचाई, गटारांची साफसफाई, दूषित पाणीपुरवठा, रस्त्यांची दुरवस्था, पावसाळ्यातील जलभराव, आरोग्य सेवा, शाळांची अवस्था आणि कचरा व्यवस्थापन यांसारख्या मूलभूत नागरी प्रश्नांवर उघड चर्चा होत आहे. मतदारही यावेळी अधिक जागरूक दिसत असून, केवळ आश्वासनांवर न भुलता ठोस कामगिरी आणि पुढील आराखड्याबाबत थेट प्रश्न विचारत आहेत. मानखुर्द वार्ड क्रमांक 143 मध्ये प्रचाराने स्फोटक वळण घेतले आहे. शिवसेना (उद्धव बाळासाहेब ठाकरे) आणि मनसे युतीच्या उमेदवारांच्या प्रचारासाठी युवासेना प्रमुख आमदार आदित्य ठाकरे आणि अमित ठाकरे यांनी मानखुर्दमध्ये शाखा भेटी देत कार्यकर्त्यांमध्ये नवी ऊर्जा निर्माण केली. या भेटींमुळे युतीच्या प्रचाराला मोठे बळ मिळाले असून, कार्यकर्ते आक्रमक पद्धतीने मैदानात उतरले आहेत.

दुसरीकडे, शिवसेना (शिंदे गट) कडून माजी आमदार शाहजी बापू पाटील यांनी प्रचारात प्रत्यक्ष सहभाग घेतला असून, स्थानिक नेत्यांच्या माध्यमातून संघटन मजबूत करण्यावर भर दिला जात आहे. याचबरोबर कामिनीताई शेवाळे यांचेही या वार्डकडे विशेष लक्ष असल्याने शिंदे गटाचा प्रचार अधिक गतिमान झाला आहे.माजी खासदार राहुल शेवाळे यांची मजबूत पकड आजही स्पष्टपणे जाणवते. अनेक वर्षांच्या राजकीय कारकिर्दीतून त्यांनी या विभागात निर्माण केलेला जनसंपर्क, कार्यकर्त्यांचे संघटन आणि स्थानिक प्रश्नांवरील हस्तक्षेप यामुळे त्यांचा प्रभाव कायम आहे. विशेषतः महाराष्ट्र नगर, मानखुर्द व आजूबाजूच्या परिसरात त्यांच्या नावाला आजही वजन आहे. ही पकड जर प्रत्यक्ष मतदानात रूपांतरित झाली, तर संबंधित गटासाठी निवडणुकीचे गणित निश्चितच सोपे होऊ शकते. कारण राहुल शेवाळे यांचे समर्थक केवळ मतदार म्हणून नाही, तर मतदानाच्या दिवशी लोकांना बाहेर काढणारी संघटित यंत्रणा म्हणून ओळखले जातात. बूथ व्यवस्थापन, कार्यकर्त्यांची उपस्थिती आणि मतदारांपर्यंत थेट पोहोच यामध्ये त्यांच्या नेटवर्कची भूमिका निर्णायक ठरू शकते.

राष्ट्रवादी काँग्रेस (अजितदादा पवार गट) चे उमेदवारही प्रचारात आघाडी घेताना दिसत आहेत. संघटित कार्यकर्ते, बैठका आणि थेट मतदार संपर्काच्या माध्यमातून त्यांनी आपली उपस्थिती ठसठशीत केली आहे. आमदार सना मलिक शेख यांचा मानखुर्द, महाराष्ट्र नगर व आसपासच्या भागात प्रभावी जनसंपर्क आहे. विधानसभा निवडणुकीत त्यांनी निर्माण केलेले संघटन, कार्यकर्त्यांचे मजबूत जाळे आणि मतदारांशी असलेला थेट संपर्क हा त्यांच्या ताकदीचा कणा मानला जातो. हीच ताकद आता महानगरपालिका निवडणुकीत अजित पवार गटाच्या राष्ट्रवादी उमेदवारासाठी वापरण्यात येत असल्याने, या उमेदवाराला मोठे बळ मिळाले आहे.

या वार्डमध्ये राष्ट्रवादी काँग्रेस (शरदचंद्र पवार गट) यांची ताकद दुर्लक्षित करून चालणार नाही. नुकत्याच पार पडलेल्या विधानसभा निवडणुकीत या गटाला दुसऱ्या क्रमांकाची मते मिळाल्याने त्यांची भक्कम मतबँक असल्याचे स्पष्ट झाले आहे. विशेष म्हणजे या गटाचा संपूर्ण फोकस महाराष्ट्र नगर परिसरावर केंद्रीत आहे. महाराष्ट्र नगरमधून किती प्रमाणात आणि कोणत्या दिशेने मतदान होते, यावरच या निवडणुकीतील अनेक समीकरणे ठरणार असल्याचे राजकीय निरीक्षकांचे मत आहे. महाराष्ट्र नगर हा वार्डमधील सर्वात मोठा आणि निर्णायक भाग मानला जात असून, येथील मतदानाची टक्केवारी वाढली तर राष्ट्रवादी (शरदचंद्र पवार) गटाला त्याचा थेट फायदा होऊ शकतो. त्यामुळे घराघरात पोहोचण्याचा, स्थानिक प्रश्न अधोरेखित करण्याचा आणि पारंपरिक समर्थकांना मतदानासाठी बाहेर काढण्याचा आटोकाट प्रयत्न या गटाकडून सुरू आहे. दुसरीकडे, राष्ट्रीय काँग्रेस देखील या निवडणुकीत ताकदीने उतरली असून, पक्षाची मदार प्रामुख्याने पारंपरिक मतदारांवर असणार आहे. अल्पसंख्याक मतदार, जुने काँग्रेस समर्थक आणि संघटित समाजगट हे काँग्रेसचे प्रमुख आधार मानले जात आहेत. काँग्रेसची मते विभागली न जाता एकसंघ राहिली, तर ती अनेक उमेदवारांचे गणित बिघडवू शकतात. एकूणच वार्ड 143 मध्ये थेट एकतर्फी लढत न होता, त्रिकोणी किंवा बहुकोणी संघर्ष होण्याची शक्यता अधिक आहे. येथे कोणाचा विजय होईल हे फक्त प्रचारावर नाही, तर मतदारांचा संभ्रम कोण दूर करतो, मतदानासाठी कोण समर्थकांना घराबाहेर काढतो आणि विशेषतः महाराष्ट्र नगरमधील मतदान किती टक्क्यांपर्यंत पोहोचते, यावर अवलंबून आहे.

🧩 10 अपक्ष उमेदवार रिंगणात; भावनिक साद घालणाऱ्या प्रचारामुळे मतदारांमध्ये संभ्रम भावनिक साद, वैयक्तिक ओळख आणि “आपलाच माणूस” ही प्रतिमा यामुळे काही मतदार अपक्षांकडे आकर्षित होत आहेत. मात्र यामुळे मतांची विभागणी होऊन निकाल अत्यंत कमी फरकाने लागण्याची शक्यता वाढली आहे. त्यामुळे प्रत्येक मत महत्त्वाचे ठरणार असून, मतदानाची टक्केवारीच निकाल ठरवणारा निर्णायक घटक ठरू शकते या सर्वांमध्ये अपक्ष उमेदवारांनीही आपली ताकद पणाला लावली आहे. विशेष म्हणजे महाराष्ट्र नगर परिसरात अनेक उमेदवार स्थानिक असल्याने ‘स्थानिक विरुद्ध स्थानिक’ असा वेगळाच पेच निर्माण झाला आहे.मानखुर्द वार्ड क्रमांक 143 मधील मुंबई महानगरपालिका निवडणुकीत यावेळी तब्बल 10 अपक्ष उमेदवार रिंगणात उतरले आहेत, त्यामुळे लढत अधिकच गुंतागुंतीची बनली आहे. हे सर्व अपक्ष उमेदवार थेट जनतेशी भावनिक नाते जोडण्याचा प्रयत्न करत असून, “एक संधी द्या, स्थानिक माणसाला निवडून द्या” अशा स्वरूपाचा प्रचार सध्या जोरात सुरू आहे. यामुळे मतदारांच्या मनात मोठा संभ्रम दिसून येत आहे. “सगळेच ओळखीचे, सगळेच आपले – पण मतदान कोणाला करायचे?” हा प्रश्न प्रत्येक चौकात, चहाच्या टपरीवर आणि घराघरांत चर्चेचा विषय ठरत आहे.

👉 त्यामुळे मानखुर्द वार्ड 143 मध्ये सध्या जरी सर्वच पक्ष ताकदीनिशी मैदानात असले, तरी जो उमेदवार मतदारांचा विश्वास संपादन करेल आणि ‘हा आपला माणूस’ ही भावना पक्की करेल — त्याचाच झेंडा अटकेपार जाणार, हे मात्र नक्की........