समाजसेवेचा वसा, विकासाचा ध्यास : ‘कोरठणचा राजा सामाजिक सेवा संस्था’ची भव्य दिनदर्शिका २०२६ प्रकाशित.
साप्ताहिक कुमजाई पर्व न्यूज कामोठे |
प्रतिनिधी श्री.वसंत भिकाजी पुंडे :
समाजसेवेचा अखंड ध्यास आणि ग्रामविकासाची ठाम ओढ घेऊन कार्यरत असलेल्या ‘कोरठणचा राजा सामाजिक सेवा संस्था’ यांच्या वतीने समस्त ग्रामस्थ पिंपळगावकरांसाठी नवीन वर्षाची खास भेट म्हणून भव्य दिनदर्शिका २०२६ प्रकाशित करण्यात आली.
श्री क्षेत्र कोरठण खंडेरायाच्या कृपा-आशीर्वादाने २५ डिसेंबर २०२५ रोजी कामोठे येथील शिव मंदिर व गणेश मंदिर या पवित्र स्थळी दिनदर्शिका प्रकाशन सोहळा अत्यंत भक्तिमय व उत्साही वातावरणात संपन्न झाला.
या मंगलप्रसंगी संस्थेचे निष्ठावंत व सक्रिय सभासद तसेच माता-माय माऊली यांच्या शुभहस्ते दिनदर्शिकेचे औपचारिक प्रकाशन करण्यात आले.
या दिनदर्शिकेमध्ये कोरठणचा राजा खंडेरायाचे दर्शन, धार्मिक-सांस्कृतिक महत्त्व, सण-उत्सव, तिथी-वार, उपक्रमांची माहिती यांचा समावेश असून प्रत्येक घरात श्रद्धा, संस्कार आणि सकारात्मक ऊर्जा पोहोचवण्याचा संस्थेचा उद्देश आहे. ग्रामस्थांनी ही दिनदर्शिका आपल्या घरात लावून कुलदैवताचे रोज दर्शन घ्यावे, असे आवाहन यावेळी करण्यात आले.
या प्रकाशन सोहळ्यास उपस्थित राहून कार्यक्रमाची शोभा वाढविणाऱ्या सर्व मान्यवर, सभासद, माता-भगिनी तसेच ग्रामस्थांचे संस्थेच्या वतीने मनापासून आभार व्यक्त करण्यात आले.
तसेच दिनदर्शिकेच्या छपाईसाठी जाहिरातीच्या माध्यमातून सहकार्य करणारे दाते, मार्गदर्शक तसेच छपाईपासून ते सर्वांपर्यंत दिनदर्शिका पोहोचवण्यासाठी परिश्रम घेणाऱ्या प्रत्येक सहकाऱ्याचे विशेष आभार संस्थेने मानले.
जाहीर आवाहन :-
गावातील सर्व मुंबईकर ग्रामस्थ व पिंपळगाव परिसरातील नागरिकांना ही दिनदर्शिका उपलब्ध करून दिली जाणार असल्याची माहिती संस्थेने दिली आहे.
समाजसेवा, धार्मिक परंपरा आणि ग्रामविकास यांचा सुंदर संगम साधणारा हा उपक्रम सर्वत्र कौतुकास पात्र ठरत आहे.
कोणत्याही टिप्पण्या नाहीत:
टिप्पणी पोस्ट करा