दुर्दैवी घटना! जेसीबीच्या धडकेत दुचाकीस्वार महिला ठार;मान्याचीवाडी परिसरात हृदयद्रावक घटना; नातेवाइकांकडून घातपाताचा आरोप

दुर्दैवी घटना! जेसीबीच्या धडकेत दुचाकीस्वार महिला ठार;मान्याचीवाडी परिसरात हृदयद्रावक घटना; नातेवाइकांकडून घातपाताचा आरोप

पाटण | प्रतिनिधी पाटण तालुक्यातील नेरळे–मेंढेघर रस्त्यावर मान्याचीवाडी (गुंजाळी) गावानजीक मंगळवारी दुपारी घडलेल्या भीषण अपघातात जेसीबीच्या धडकेत दुचाकीवरील विवाहित महिला जागीच ठार झाली, तर तिचा पती गंभीर जखमी झाला. या घटनेमुळे परिसरात हळहळ व्यक्त करण्यात येत असून काही काळ तणावाचे वातावरण निर्माण झाले होते. नम्रता भाऊ कानडे (वय २३, रा. किल्ले मोरगिरी, ता. पाटण) असे अपघातात मृत्युमुखी पडलेल्या महिलेचे नाव आहे. या अपघाताची नोंद पाटण पोलीस ठाण्यात करण्यात आली आहे. पोलिस व घटनास्थळावरून मिळालेल्या माहितीनुसार, किल्ले मोरगिरी येथील भाऊ मनोहर कानडे (वय २७) हे पत्नी नम्रता कानडे यांच्यासह दुचाकी क्रमांक एमएच ५० डब्ल्यू ८२७४ वरून मोरगिरीकडे जात होते. दुपारी सुमारे दीड वाजण्याच्या सुमारास नेरळे–मेंढेघर रस्त्यावर मान्याचीवाडी गावाजवळ समोरून येणाऱ्या जेसीबी (क्रमांक एमएच ११ यू ६९८९) ने त्यांच्या दुचाकीला जोराची धडक दिली. या भीषण धडकेत दोघेही रस्त्यावर फेकले गेले. त्यात नम्रता कानडे यांच्या डोक्याला गंभीर मार लागल्याने त्यांचा जागीच मृत्यू झाला, तर भाऊ कानडे गंभीर जखमी झाले. त्यांना तातडीने कऱ्हाड येथील वेणूताई चव्हाण उपजिल्हा रुग्णालयात उपचारासाठी दाखल करण्यात आले असून त्यांच्यावर उपचार सुरू आहेत. अपघातानंतर मृतदेह शवविच्छेदनासाठी येथील ग्रामीण रुग्णालयात नेण्यात आला. मात्र, या घटनेत घातपाताची शक्यता व्यक्त करत, सखोल चौकशी होईपर्यंत मृतदेह ताब्यात घेणार नसल्याचा पवित्रा मृत महिलेच्या नातेवाइकांनी घेतला. यामुळे घटनास्थळी व रुग्णालय परिसरात काही काळ तणावाचे वातावरण निर्माण झाले होते. दरम्यान, पोलिसांनी नातेवाइकांना घटनास्थळी नेऊन प्रत्यक्ष परिस्थिती दाखवली व प्राथमिक तपासाची माहिती दिल्यानंतर नातेवाइकांनी रात्री उशिरा मृतदेह ताब्यात घेतला. आज दुपारी पोलिस बंदोबस्तात नम्रता कानडे यांच्या मृतदेहावर अंत्यसंस्कार करण्यात आले. या अपघाताबाबत जखमी भाऊ कानडे यांचे वडील मनोहर कानडे यांनी पाटण पोलिस ठाण्यात तक्रार दाखल केली आहे. अपघाताची माहिती मिळताच उपविभागीय पोलीस अधिकारी विजय पाटील यांनी घटनास्थळी भेट देऊन पाहणी केली. सहाय्यक पोलीस निरीक्षक प्रकाश भुजबळ पुढील तपास करत आहेत. या दुर्दैवी घटनेमुळे किल्ले मोरगिरी व परिसरात शोककळा पसरली असून अवघ्या २३ व्या वर्षी नम्रता कानडे यांचा अकाली मृत्यू झाल्याने सर्वत्र हळहळ व्यक्त होत आहे.