*पाटण: कुणबी प्रमाणपत्रांवरील अन्यायाविरोधात आमरण उपोषणाचा इशारा* *शुक्रवार, १९ डिसेंबर २०२५ रोजी पाटण येथे महत्त्वाची आयोजन बैठक*

पाटण : कुणबी प्रमाणपत्रांवरील अन्यायाविरोधात आमरण उपोषणाचा इशारा शुक्रवार, १९ डिसेंबर २०२५ रोजी पाटण येथे महत्त्वाची आयोजन बैठक

पाटण : कुणबी प्रमाणपत्रासाठी पुरावे सादर करून अर्ज केलेल्या अनेक मराठा समाजबांधवांचे अर्ज चुकीची नियमावली लावून व तांत्रिक कारणे पुढे करून निकाली काढले जात असल्याचा गंभीर आरोप सकल मराठा समाज, पाटण तालुक्याच्या वतीने करण्यात आला आहे. या अन्यायाविरोधात पुढील तीव्र आंदोलनाची दिशा ठरवण्यासाठी शुक्रवार दि. १९ डिसेंबर २०२५ रोजी दुपारी २ वाजता पाटण तालुका प्राथमिक शिक्षक बँक सभागृह, मुळगाव रोड, पाटण येथे एक महत्त्वाची आयोजन बैठक आयोजित करण्यात आली आहे. या बैठकीत कुणबी प्रमाणपत्र नाकारण्यात आलेल्या अर्जदारांची प्रकरणे, प्रशासनाकडून लावली जात असलेली चुकीची नियमावली, तसेच पुढील आमरण उपोषणासह तीव्र आंदोलनाचा निर्णय यावर सविस्तर चर्चा होणार आहे. तहसील कार्यालयात कुणबी प्रमाणपत्रासाठी समाजावर होत असलेल्या अन्यायाविरोधात एकत्रित भूमिका घेण्यासाठी ही बैठक अत्यंत महत्त्वाची असल्याचे सकल मराठा समाजाच्या पदाधिकाऱ्यांनी स्पष्ट केले आहे. चुकीच्या नियमावलीमुळे अर्जदारांवर अन्याय कुणबी नोंदी असलेले पुरावे, जुनी महसुली कागदपत्रे, वंशावळी, गाव नमुने व ऐतिहासिक नोंदी असूनही अनेक अर्जदारांचे अर्ज फेटाळले जात आहेत. शासनाच्या मूळ निर्णयाच्या विरोधात जाऊन काही ठिकाणी अतिरिक्त व अवास्तव अटी लावल्या जात असल्याने समाजात तीव्र असंतोष निर्माण झाला आहे. हा अन्याय केवळ काही व्यक्तींवर नव्हे, तर संपूर्ण मराठा समाजाच्या हक्कांवर घाला असल्याची भावना व्यक्त केली जात आहे. “नोंदी आहेत, हक्क आहे; तरीही आरक्षण नाही..!” सकल मराठा समाजाच्या वतीने उपस्थित करण्यात आलेला हा मुद्दा गेल्या ५८ वर्षांपासून कुणबी नोंद असलेल्या मराठा कुटुंबांवर होत असलेल्या अन्यायाकडे लक्ष वेधतो. नोंदी असूनही आरक्षणाचा लाभ न मिळणे, तसेच प्रमाणपत्रासाठी वारंवार अपमानास्पद प्रक्रियेला सामोरे जावे लागणे, ही गंभीर बाब असल्याचे समाजबांधवांचे म्हणणे आहे. उपस्थित राहण्याचे आवाहन कुणबी प्रमाणपत्रांसाठी अर्ज केलेले व चुकीच्या कारणांवरून अर्ज नाकारण्यात आलेले सर्व अर्जदार, तसेच मराठा समाजातील सर्व समाजबांधवांनी या बैठकीस मोठ्या संख्येने उपस्थित राहावे, असे आवाहन सकल मराठा समाज – पाटण तालुक्याच्या वतीने करण्यात आले आहे. या बैठकीतून आंदोलनाची पुढील दिशा ठरवली जाणार असून, प्रशासनाने तात्काळ न्याय न दिल्यास आमरण उपोषणासारखे तीव्र पाऊल उचलले जाईल, असा इशाराही देण्यात आला आहे. कुणबी नोंदींच्या जतनाची तातडीची गरज मोडी लिपीतील ऐतिहासिक दस्तावेज दुर्लक्षित पाटण : कुणबी प्रमाणपत्रांच्या संदर्भात महत्त्वाची आणि धक्कादायक माहिती समोर आली असून १८८० ते १९१२ या कालावधीतील कुणबी नोंदी मोडी लिपीमध्ये उपलब्ध आहेत, मात्र या नोंदी आजपर्यंत अधिकृतपणे जाहीर करण्यात आलेल्या नाहीत. याउलट १९१३ ते २०२५ या कालावधीतील सर्व कुणबी नोंदी मराठी भाषेत असून त्या नोंदी शासनाकडून जाहीर करण्यात आल्या आहेत, अशी माहिती सकल मराठा समाजाच्या वतीने देण्यात आली. मोडी लिपीतील नोंदी सार्वजनिक न झाल्यामुळे अनेक कुणबी नोंद असलेल्या मराठा कुटुंबांना आजही प्रमाणपत्रासाठी संघर्ष करावा लागत आहे. ऐतिहासिक पुरावे असूनही ते उपलब्ध न करून दिल्याने समाजावर अन्याय होत असल्याची तीव्र भावना व्यक्त केली जात आहे. समाजबांधवांच्या प्रयत्नातून मोडी नोंदींचा शोध दरम्यान, काही गावांमधील मोडी लिपीतील कुणबी नोंदी सकल मराठा समाज बांधवांच्या सातत्यपूर्ण प्रयत्नांमुळे शोधण्यात यश आले आहे. या नोंदींमुळे अनेक कुटुंबांचे ऐतिहासिक हक्क सिद्ध होत असून, त्या नोंदी शासनाने अधिकृतरीत्या मान्य करून सार्वजनिक कराव्यात, अशी जोरदार मागणी करण्यात येत आहे. जीर्ण दस्तावेजांच्या जतनाची मागणी सदर मोडी लिपीतील नोंदी असलेले दस्तावेज अत्यंत जीर्ण व नाजूक अवस्थेत असून, काळाच्या ओघात ते नष्ट होण्याची भीती निर्माण झाली आहे. त्यामुळे या मौल्यवान ऐतिहासिक कागदपत्रांचे डिजिटायझेशन, शास्त्रीय पद्धतीने जतन व भाषांतर (मोडी ते मराठी) तातडीने करणे आवश्यक असल्याची मागणी मराठा समाजाच्या वतीने करण्यात आली आहे.