कराडात मित्रावरच कोयत्याने हल्ला; एक गंभीर जखमी.
कराड, दि. १८ (साप्ताहिक कुमजाई पर्व प्रतिनिधी)
येथील मंगळवार पेठ परिसरात पूर्वी झालेल्या भांडणाचा राग मनात धरून मित्रानेच मित्रावर कोयत्यासारख्या धारदार शस्त्राने वार केल्याची धक्कादायक घटना गुरुवारी सायंकाळी सुमारे सहा वाजण्याच्या सुमारास घडली. या हल्ल्यात एक युवक गंभीर जखमी झाला असून त्याच्यावर रुग्णालयात उपचार सुरू आहेत.
याबाबत घटनास्थळावरून व पोलिसांकडून मिळालेल्या माहितीनुसार, मंगळवार पेठ परिसरात गुरुवारी सायंकाळी काही मित्र एकत्र असताना पूर्वी झालेल्या वादाचा विषय पुन्हा उफाळून आला. किरकोळ वादाचे रूपांतर हाणामारीत झाले. वाद वाढत गेल्याने एका अल्पवयीन युवकाने आपल्या मित्रावर कोयत्यासारख्या धारदार शस्त्राने अचानक वार केला.
हल्ल्याच्या वेळी घटनास्थळी उपस्थित असलेल्या इतर मित्रांनी भांडण सोडविण्याचा प्रयत्न केला. मात्र कोयत्याचा वार थेट जखमी युवकाच्या पाठीवर बसल्याने तो रक्तबंबाळ अवस्थेत खाली कोसळला. त्याला तात्काळ उपचारासाठी नजीकच्या रुग्णालयात दाखल करण्यात आले असून त्याची प्रकृती गंभीर असल्याची माहिती मिळाली आहे.
घटनेची माहिती मिळताच कराड शहर पोलीस ठाण्याचे वरिष्ठ पोलीस निरीक्षक राजू ताशिलदार यांनी आपल्या सहकाऱ्यांसह घटनास्थळी धाव घेतली. परिसराची पाहणी करून घटनेची माहिती घेतली. या प्रकरणात दोघेही युवक अल्पवयीन असल्याचे निष्पन्न झाले असून हल्ला करणाऱ्या अल्पवयीन मुलास पोलिसांनी ताब्यात घेतले आहे.
या घटनेमुळे मंगळवार पेठ परिसरात काही काळ तणावाचे वातावरण निर्माण झाले होते. रात्री उशिरापर्यंत कराड शहर पोलीस ठाण्यात गुन्हा नोंद करण्याची प्रक्रिया सुरू होती. पुढील तपास कराड शहर पोलीस करत आहेत.
कोणत्याही टिप्पण्या नाहीत:
टिप्पणी पोस्ट करा