घरपट्टी भरली की डस्टबिन मोफत! ताईगडेवाडी ग्रामपंचायतीचा नाविन्यपूर्ण उपक्रम.
तळमावळे, दि. २४ डिसेंबर
(साप्ताहिक कुमजाई पर्व न्यूज प्रतिनिधी)
मुख्यमंत्री समृद्ध पंचायतराज अभियानांतर्गत ग्रामपंचायत ताईगडेवाडी (ता. पाटण) यांच्या वतीने सन २०२५–२६ या आर्थिक वर्षातील घरपट्टी वेळेत भरणाऱ्या नागरिकांना मोफत डस्टबिन देण्याचा नाविन्यपूर्ण उपक्रम राबविण्यात येत आहे. या उपक्रमाला ग्रामस्थांचा उत्स्फूर्त प्रतिसाद मिळत असून कर भरण्याबाबत सकारात्मक वातावरण निर्माण झाले आहे.
ग्रामपंचायतीने स्वच्छता, करसंकलन आणि नागरिकांमध्ये जागरूकता वाढविण्याच्या दृष्टीने हा उपक्रम सुरू केला आहे. घरपट्टी भरल्यावर प्रत्येक कुटुंबाला ओला व सुका कचरा वेगळा करण्यासाठी उपयुक्त ठरणारे डस्टबिन दिले जात असून त्यामुळे गावातील स्वच्छतेला चालना मिळणार आहे.
या उपक्रमाबाबत माहिती देताना सरपंच सूरज यादव यांनी सांगितले की, “घरपट्टी भरणे ही ग्रामपंचायतीची महत्त्वाची जबाबदारी असून त्यातूनच गावाच्या विकासकामांना गती मिळते. नागरिकांनी वेळेत कर भरावा, तसेच स्वच्छतेकडेही गांभीर्याने पाहावे, या उद्देशाने हा उपक्रम राबविण्यात येत आहे. ग्रामस्थांचा मिळणारा प्रतिसाद उत्साहवर्धक आहे.”
याचबरोबर ग्रामपंचायत सदस्य, कर्मचारी वर्ग व स्वच्छता कर्मचाऱ्यांचेही या उपक्रमासाठी सहकार्य लाभत आहे. करसंकलन वाढल्यास गावातील रस्ते, पाणीपुरवठा, स्वच्छता व इतर मूलभूत सुविधांसाठी निधी उपलब्ध होणार असून ताईगडेवाडी ग्रामपंचायत समृद्ध पंचायतराज अभियानात आदर्श ठरण्याच्या दिशेने वाटचाल करीत आहे.
ग्रामस्थांनी या उपक्रमाचा लाभ घ्यावा व घरपट्टी वेळेत भरून गावाच्या सर्वांगीण विकासात सहभागी व्हावे, असे आवाहन ग्रामपंचायतीच्या वतीने करण्यात आले आहे.
कोणत्याही टिप्पण्या नाहीत:
टिप्पणी पोस्ट करा