धक्कादायक प्रकार ! 'पारनेरमधील आजीच्या खून प्रकरणी नातू, नातसूनेस अटक'; दाेघांनी रचला बनाव, नेमकं काय घडलं?

धक्कादायक प्रकार ! 'पारनेरमधील आजीच्या खून प्रकरणी नातू, नातसूनेस अटक'; दाेघांनी रचला बनाव, नेमकं काय घडलं?

पारनेर दि.17 नोव्हेंबर 2025 प्रतिनिधी - वसंत भिकाजी पुंडे

आजीचा खून करून तिच्या अंगावरील सुमारे ३ लाख ८ हजारांचा ऐवज घेऊन पळून गेलेल्या नातवास व त्याच्या पत्नीस पोलिसांनी आज (ता. १७) ताब्यात घेतले. गुन्हा घडल्यानंतर २४ तासांच्या आत आरोपींना ताब्यात घेण्यात पारनेर पोलिसांना यश आले आहे.

याबाबत अधिक माहिती अशी, रविवारी (ता. १६) गारगुंडी येथील चंद्रभागा फापाळे यांचा खून झाला होता. घरी कोणीच नसताना त्यांचा गळ्यातील व कानातील दागिने चोरीच्या हेतूने खून झाला होता.

या बाबत चंद्रभागा फापाळे यांचा मुलगा पंढरीनाथ फापाळे यांनी पारनेर पोलिस ठाण्यात फिर्याद दिली होती. त्या फिर्यादीवरून तेजस शांताराम फापाळे व त्याची पत्नी वैष्णवी तेजस फापाळे यांच्या विरोधात पारनेर पोलिस ठाण्यात गुन्हा दाखल झाला होता. गुन्हा दाखल झाल्यानंतर पोलिसांची तीन पथके तयार करण्यात आली होती.

त्यातील एका पथकाने टाकळी ढोकेश्वर ते आळे फाटा रस्त्यावर पाठलाग करून तेजस व वैष्णवी यांना ताब्यात घेतले. पुढील तपास पोलिस निरीक्षक संतोष खेडकर यांच्या मार्गदर्शनाखाली सहायक पोलिस निरीक्षक दीपक सरोदे करत आहेत.