राष्ट्रसेवा आरोग्य कर्मचारी संघटना सातारा ची जिल्हास्तरीय सहविचार सभा उत्साहात संपन्न..

राष्ट्रसेवा आरोग्य कर्मचारी संघटना सातारा ची जिल्हास्तरीय सहविचार सभा उत्साहात संपन्न..

   शनिवार दिनांक 12/07/2025 रोजी राष्ट्रसेवा आरोग्य कर्मचारी संघटना सातारा ची जिल्हास्तरीय सहविचार सभा ग्रामविकास भवन सातारा येथे जिल्हा अध्यक्ष श्री चंद्रकांत पाटील यांचे अध्यक्षतेखाली आणि बहुसंख्य सभासदांच्या उपस्थितीत पार पडली.यावेळी आरोग्य कर्मचारी बांधवांच्या समस्या सोडवण्याबाबत संघटनेमार्फत ठोस पाऊले उचलण्याबाबत सर्वानुमते निर्णय घेण्यात आले.यामध्ये..

🔸जिल्हा परिषद सातारा कडील आरोग्य कर्मचारी यांचे नियमित मासिक वेतन 2 ते 3 महिने प्रलंबित राहत असून हे वेतन वेळेवर न झाल्यास संघटनेमार्फ ऑनलाईन हजेरीवर बहिष्कार तसेच रिपोर्टिंग बंद करण्याबाबतचे निवेदन मा.जिल्हा आरोग्य अधिकारी यांना देण्याचे ठरले.तसेच सेवेत नव्याने रुजू आरोग्य कर्मचारी यांचे सेवाविषय प्रश्न सोडविण्याबाबत प्रशासनाकडे पाठपुरावा करण्यात येईल.

🔸हिवताप विभागडील आरोग्य कर्मचारी यांचे विनंती बदली प्रक्रिया समुपदेशन पद्धत राबवून करणे,एकूण रिक्त पदांपैकी 25 टक्के पदे सरळ सेवेने भरली असून उर्वरित रिक्त 75 टक्के पदांवर पदोन्नती होण्यासाठी विभागीय स्तरावर पाठपुरावा करण्याचे ठरवण्यात आले.

    *यासोबतच जिल्हा संघटना राज्य कार्यकारिणी बरोबर करत असलेल्या कामकाजाची माहिती कर्मचारी बांधवांना देण्यात आली.यामध्ये आरोग्य सेवक पदनाम बदल,वेतन त्रुटी दूर करण्यासाठी संघटनेने केलेलं प्रयत्न,ऑनलाईन कामकाज करण्यासाठी इतर संवर्गीय कर्मचाऱ्याप्रमाणे आरोग्य सेवक बांधवांना मोबाईल भत्ता मंजूर करण्यासाठी पाठपुरावा,दुसरा आणि चौथा शनिवार सुट्टी मिळण्यासाठी संघटनेने केलेले प्रयत्न यांची माहिती कर्मचाऱ्यांना देण्यात आली.यावेळी कार्यक्षेत्रात कर्मचारी बांधवांना कामकाज करत असताना येणाऱ्या अडचणींबाबत चर्चा करून त्या सोडवण्यासाठी प्रयत्न करण्याचे सर्वानुमते ठरवण्यात आले.यावेळी नवीन कर्मचारी बांधवांचे संघटनेमार्फत स्वागत करण्यात आले*

   *यावेळी संघटनेचे राज्य कार्याध्यक्ष श्री गणेश दहिफळे,जिल्हा अध्यक्ष श्री चंद्रकांत पाटील,जिल्हा सचिव श्री श्रीकांत माळवे,जिल्हा कार्यकारी अध्यक्ष श्री रामहरी तांदळे,श्री सुखदेव वायदंडे,जिल्हा उपाध्यक्ष श्री सचिन राठोड,श्री अमोल गंबरे,श्री प्रशांत तायडे,श्री संदीप साळुंखे,संघटक श्री रोहित भोकरे,श्री महेश जाधव श्री हणमंत बरकडे यांचेसह बहुसंख्य कर्मचारी बांधव उपस्थित होते.*

पाटण - मनसे आक्रमक! 'पाटणला मनसेचे उपोषण सुरूच'; दुसऱ्या दिवशी अनेकांची भेट, कराड - चिपळूण रस्त्याचा प्रश्न.

पाटण - मनसे आक्रमक! 'पाटणला मनसेचे उपोषण सुरूच'; दुसऱ्या दिवशी अनेकांची भेट, कऱ्हाड- चिपळूण रस्त्याचा प्रश्न.

पाटण : कराड - चिपळूण राष्ट्रीय महामार्गाची झालेली दुरवस्था व लेखी आश्वासन देऊनही केलेल्या टोलवाटोलवीविरोधात महाराष्ट्र नवनिर्माण सेनेचे तालुकाध्यक्ष गोरख नारकर यांनी कालपासून येथील प्रांत कार्यालयासमोर उपोषण सुरू केले आहे.उपोषण आज दुसऱ्या दिवशीही कायम राहिले.

वारंवार पत्रव्यवहार, आंदोलने, उपोषणे करूनही राष्ट्रीय महामार्ग व संबंधित प्रशासन कंपनीला पाठीशी घालत असल्याचा आरोप होत आहे. कऱ्हाड- चिपळूण रस्त्याच्या कामाबाबत अनेक तक्रारी होऊन वारंवार बैठका देखील झाल्या. मात्र, राष्ट्रीय महामार्ग विभाग याकडे जाणीवपूर्वक दुर्लक्ष करत आहे. उपोषणादरम्यान केलेल्या मागण्यांची पूर्तता झाल्याशिवाय आंदोलन स्थगित करणार नाही.

उपोषण ठिकाणी येऊन गोड बोलण्याला भाळणार नाही. राष्ट्रीय महामार्गाचे अधिकारी करमणूक कार्यक्रमाला गेल्यासारखे आंदोलन पाहायला येतात. त्यांना आंदोलनाचे गांभीर्य नाही. संबंधित कंपनी व ठेकेदाराविरोधात कारवाई केल्यावरच मनसेचे आंदोलन स्थगित होईल, अन्यथा आंदोलनाची तीव्रता वाढवू, असा इशारा नारकर व मनसे पदाधिकारी यांनी आज दिला.

उपोषणाच्या दुसऱ्या दिवशी पोलिस निरीक्षक अविनाश कवठेकर यांनी भेट दिली. दरम्यान, दयानंद नलावडे, राहुल संकपाळ, भाजप समन्वयक विक्रमबाबा पाटणकर, अक्षय देसाई, संपत देसाई, बापू टोळे, संजय पवार, बळीराम गायकवाड, चंद्रकांत देसाई यांनी आज आंदोलनाला पाठिंबा दिला.

पाटणमध्ये उलटा धबधबा पाहायला गेले, कार ३०० फूट दरीत कोसळली; फोटोशूटच्या नादात अपघात.

पाटण - धबधबा पाहायला गेलेल्या युवकांची कार दरीत कोसळली; फोटोशूटच्या नादात अपघात.

पाटण तालुक्यातील सडा वाघापूर रस्त्यावर गुजरवाडीनजीक टेबल पॉईंटवरत कार खोल दरीत कोसळून झालेल्या अपघातात साहिल अनिल जाधव (वय २० रा. गोळेश्वर, ता. कराड) गंभीर जखमी झाला. जखमीला उपचारासाठी कराडच्या सह्याद्री हाँस्पिटलमध्ये पाठवण्यात आले आहे.

हा अपघात बुधवारी सायंकाळी ४ वाजण्याच्या दरम्यान झाला.

– कार गवतावरून घसरून थेट दरीत
सडा वाघापूरला उलटा धबधबा पाहायला जात असताना टेबल पॉईंटवरती अनेक पर्यटक फोटोशूट व करमणुकीसाठी थांबतात. बुधवारी सायंकाळी ४ च्या दरम्यान साहिल अनिल जाधव आपल्या मित्रांसमवेत फिरण्यासाठी आला होता. सोबतचे मित्र फोटो काढण्यात मग्न होते. दरम्यान, गाडीमध्ये साहिल जाधव हा एकटाच होता. गाडीला हॅंण्ड ब्रेक लागला नसल्याने गाडी गवतावरुन खोल दरीत कोसळली.

शेळ्या चारणाऱ्या युवकाचे प्रसंगावधान.
म्हावशी येथील बकरी चारण्यासाठी गेलेल्या मंगेश तुकाराम जाधव या युवकास अपघाताचा आवाज आल्याने तो घटनास्थळी पोहचला. दरीतील कोसळलेल्या गाडीचा दरवाजा तोडून त्याने अडकलेल्या अनिलला बाहेर काढले. यावेळी उपस्थित नागरिकांनी आरडाओरडा करत प्रशासनाशी संपर्क साधला. उपस्थितांनी प्रसंगावधान राखत जखमीस तात्काळ उपचारासाठी दवाखान्यात दाखल केले. नशीब बलवत्तर म्हणून साहिलचे प्राण वाचले. जखमी साहिलची तब्येत बरी असल्याचे दवाखाना प्रशासनाने सांगितले.

मुख्यालयी अनुपस्थित अधिकाऱ्यांवर कारवाईचे संकेत: पाटण पंचायत समितीकडून यादी मागवली

मुख्यालयी अनुपस्थित अधिकाऱ्यांवर कारवाईचे संकेत: पाटण पंचायत समितीकडून यादी मागवली.

पाटण - राज्य शासनाच्या स्पष्ट आदेशांना न जुमानता, जिल्ह्यातील 36 विभागांतील अनेक प्राथमिक शिक्षक, पर्यवेक्षक, मुख्याध्यापक, ग्रामविकास अधिकारी, आरोग्य सेवक आणि सहाय्यक अधिकारी 16 जून 2025 पासून मुख्यालयी उपस्थित राहत नसल्याचे उघड झाले आहे.

पाटण पंचायत समितीला 8 जुलै रोजी प्राप्त झालेल्या अधिकृत ई-मेलमुळे मुख्यालयी राहणे टाळणाऱ्या अधिकाऱ्यांमध्ये खळबळ उडाली आहे.

पाटण पंचायत समितीला मंगळवारी प्राप्त झालेल्या ई-मेलमध्ये मुख्यालयी नियमित उपस्थित न राहणाऱ्या अधिकाऱ्यांची यादी मागवण्यात आली आहे. यासोबतच जिल्हा परिषदेने संबंधितांवर दंडात्मक कारवाईचे संकेत दिले आहेत. अनेक अधिकारी आणि कर्मचारी शासकीय आदेश धुडकावून मुख्यालयी राहत नसल्याने प्रशासनाने कठोर पावले उचलण्याचा निर्णय घेतला आहे.

शिस्तभंगाची कारवाई सुरू होणार
या ई-मेलनंतर पंचायत समितीच्या प्रशासकीय कामांना वेग आला असून, मुख्यालयी अनुपस्थित असलेल्या अधिकारी आणि कर्मचाऱ्यांची यादी तयार करण्याचे काम सुरू झाले आहे. यामुळे अधिकाऱ्यांमध्ये चिंता आणि गोंधळाचे वातावरण आहे. आपत्ती व्यवस्थापनाच्या पार्श्वभूमीवर प्रशासन अधिक सतर्क झाले असून, शासनाचे आदेश झुगारणाऱ्यांवर शिस्तभंगाची कारवाई सुरू करण्याचे स्पष्ट निर्देश जिल्हा प्रशासनाने दिले आहेत.

पाटण तालुक्यातील सरपंचपदाची आरक्षण सोडत संपन्न; वाचा तुमच्या गावात कोणते आरक्षण ?

पाटण तालुक्यातील सरपंचपदाची आरक्षण सोडत संपन्न; वाचा तुमच्या गावात कोणते आरक्षण ?

पाटण तालुक्यातील 235 ग्रामपंचायतींच्या सरपंच पदासाठी शुक्रवारी आरक्षण सोडत झाली. सुमारे 119 ग्रामपंचायतीच्या सरपंच पदासाठी महिलांना संधी मिळाली आहे. या महिला सरपंचांमध्ये अनुसूचित जमाती एक, अनुसूचित जाती 11, नागरिकांचा मागास प्रवर्ग 32 तर सर्वसाधारण 75 अशा एकूण 119 ग्रामपंचायतीवर महिलाराज येणार आहे.

सन 2025 ते 2030 या पाच वर्षांच्या ग्रामपंचायत सरपंच पदासाठी हा कार्यकाळ निश्चित करण्यात आला आहे.

शुक्रवारी कै. वत्सलादेवी देसाई कृषी संकुल काळोली येथे पाटण तालुक्यातील 235 ग्रामपंचायतींचे आरक्षण उपविभागीय अधिकारी सोपान टोम्पे व तहसीलदार अनंत गुरव यांच्या मार्गदर्शनाखाली संपन्न झाले. या आरक्षणामध्ये अनुसूचित जमातीच्या एका जागेसाठी महिला आरक्षण निश्चित झाले आहे. तर अनुसूचित जातीच्या 21 पैकी 11 ठिकाणी महिला, नागरिकांचा मागास प्रवर्गच्या 64 पैकी 32 गावात महिला, सर्वसाधारणच्या 149 पैकी 75 महिला अशा एकूण 119 ठिकाणी महिलांना संधी मिळाली आहे.

अनुसूचित जाती महिला सरपंच पदासाठी

वांझोळे, दिवशी खुर्द, साखरी, रासाटी, बनपुरी, रूवले, मरळोशी, उमरकांचन, मणदुरे, घाणबी, अडुळपेठ गावे आरक्षित झाली आहेत. अनुसूचित जातीसाठी चोपदारवाडी, नुने, सावरघर पुर्नवसन, बिबी, ढेबेवाडी, मंद्रूळ हवेली, नाडोली, माजगाव, शिरळ, मालोशी गावे आरक्षित झाली आहेत. तर अनुसूचित जमाती महिलासाठी मुरूड गाव आरक्षित झाले आहे. नागरिकांचा मागास प्रवर्गासाठी झाकडे, गोकूळ तर्फ हेळवाक, मंद्रुळकोळे, भोसगाव, आंबवडे खुर्द, उधवणे, पाबळवाडी, नाणेगाव बुद्रुक, टोळेवाडी, महिंद, मोरगिरी, दुसाळे, गमेवाडी पवारवाडी, मस्करवाडी, माथणेवाडी, नहिंबे-चिरंबे, बांधवट, घोट, मेंढोशी, शिवंदेश्वर, अडुळ गावठाण, हुंबरळी, धायटी, हुंबरवाडी, मत्रेवाडी, ढाणकल, धसगाव, चौगुलेवाडी (सांगवड), साबळेवाडी, येरफळे, सोनाईचीवाडी ही गावे आरक्षित झाली आहेत.

सर्वसाधारण महिला सरपंचपदासाठी 

आंबळे, आंबवणे, आंबेघर तर्फ मरळी, आबदारवाडी, कडवे बुद्रुक, करपेवाडी, कराटे, कळकेवाडी, कवडेवाडी, कवरवाडी, कसणी, काडोली, काढणे, कातवडी, काळोली, किल्ले मोरगिरी, कुंभारगाव, कुठरे, कुसवडे, केरळ, केळोली, कोकिसरे, कोदळ पुर्नवसन, कोळेकरवाडी, गारवडे, गावडेवाडी, गिरेवाडी, गुढे, गोवारे, गोषटवाडी, चव्हाणवाडी (धामणी), चव्हाणवाडी (नाणेगाव), चाफोली, चिखलेवाडी, चौगुलेवाडी (काळगाव), जमदाडवाडी, जरेवाडी, जळव, जानुगडेवाडी, ठोमसे, तारळे, दाढोली, धावडे, नवसरवाडी, नारळवाडी, निवकणे, निसरे, नेचल, पाचुपतेवाडी, पाळशी, बाचोली, बेलवडे खुर्द, भिलारवाडी, भुडकेवाडी, मल्हारपेठ, मानेवाडी, मारूल तर्फ पाटण, मुळगाव, मोरेवाडी, येराडवाडी, वजरोशी, वाडीकोतावडे, विरेवाडी, शिंगणवाडी, शिंदेवाडी, शितपवाडी, शेडगेवाडी (विहे), सडावाघापूर, सणबूर, सुतारवाडी, सुपूगडेवाडी, सुरूल, सोनवडे, मणेरी, काळगाव ग्रामपंचायती आरक्षित झाल्या.

सर्वसाधारण खुला प्रवर्गासाठी 

आंब्रग, आंब्रुळे, आटोली, आडदेव, असवलेवाडी, कडवे खुर्द, कळंबे, काठी, कुसरूंड, कोंजवडे, कोरिवळे, खराडवाडी, खळे, खिवशी, खोनोली, गलमेवाडी, गव्हाणवाडी, गाढवखोप, गुंजाळी, गोठणे, घाणव, घोटील, जाधववाडी, जाळगेवाडी, जिंती, डांगिष्टेवाडी, डावरी, डिगेवाडी, डेरवण, डोंगळेवाडी, तामकडे, तामिणे, तोंडोशी, त्रिपुडी, दिवशी बुद्रुक, धडामवाडी, धामणी, नाटोशी, नाडे, नाणेल, नाणेगाव खुर्द, नावडी, निवडे पुर्नवसन, निवी, पाचगणी, पाठवडे, पाडळोशी, पेठशिवापूर, बनपेठवाडी, बांबवडे, बोंद्री, बोडकेवाडी, मंद्रुळकोळे खुर्द, मरळी, मराठवाडी, मान्याचीवाडी, मारूल हवेली, मालदन, मेंढेघर, म्हावशी, येराड, रामिष्टेवाडी, राहुडे, लेंढोरी, वाघजाईवाडी, वाझोली, वाटोळे, विहे, वेताळवाडी, संभाजीनगर (वेखंडवाडी), सळवे, सांगवड, साईकडे, सुळेवाडी 

नागरिकांचा मागास प्रवर्ग महिलांसाठी राखीव

नागरिकांचा मागास प्रवर्ग महिला सरपंच पदासाठी काहीर, पापर्डे, शिद्रकवाडी, केर, उरूल, भारसाखळे, निगडे, चिटेघर, ढोरोशी, कारवट, पिंपळोशी, सातर, हेळवाक, कोचरेवाडी, टेळेवाडी, पाणेरी, बहुले, कारळे, कामरगाव, नाव, चाळकेवाडी, ताईगडेवाडी, नेरळे, गोकूळ तर्फ पाटण, चोपडी, आवर्डे, डाकेवाडी, काळगाव, हावळेवाडी, शेडगेवाडी, लुगडेवाडी, चाफळ, मेंढ ही गावे आरक्षित झाली आहेत.

या गावच्या सरपंच पदांचा समावेश झालेला आहे. 2025 ते 2030 या पुढील पाच वर्षांसाठी 235 ग्रामपंचायतीचे आरक्षण जाहीर करण्यात आले आहे. या आरक्षण सोडतीवेळी नायब तहसीलदार पंडित पाटील, रवी सावंत, विनायक पाटील, संतोष गरुड, शकील मुल्ला, मंडलाधिकारी असवले तसेच विविध पक्षांचे पदाधिकारी उपस्थित होते.

कुंभारगाव ग्रामपंचायतीत सरपंच सर्वसाधारण महिला प्रवर्ग आरक्षण.

सातारा जिल्ह्यात सरपंचपदासाठी तालुकानिहाय आरक्षण सोडत सर्व तालुक्यांत आज दिनांक 4 जुलै रोजी सकाळी 11 वाजता काढण्यात आली आहे.

जनतेतून थेट सरपंच निवड असल्यामुळे आपल्या गावचे सरपंचपदाचे आरक्षण कोणते पडणार, याची गावोगावी उत्सुकता निर्माण झाली आहे. आगामी स्थानिक स्वराज्य संस्थांच्या निवडणुकांसाठी ही सोडत अत्यंत महत्त्वाची असून राजकीय समीकरणांना कलाटणी मिळणार आहे. त्यामुळे या सरपंच आरक्षण सोडतीकडे जिल्ह्याचे लक्ष लागले होते .

पाटण तालुक्यातील महत्वाची ग्रामपंचायत असलेल्या कुंभारगाव ग्रामपंचायतीत सन  2025 - 2030 या पंचवार्षिक कालावधीसाठी सर्वसाधारण महिला प्रवर्ग असे आरक्षण आले आहे.

 

 

काळगाव - मरणानंतरही यातना... गावाला स्मशानभूमी नाही, तुफान बरसणाऱ्या पावसात प्रेताला अग्नि कसा द्यायचा?

संग्रहित चित्र

 

पाटण तालुक्यातील काळगाव येथील चोरगेवाडी हे गाव स्वातंत्र्यानंतर ७५ वर्षे उलटून गेल्यानंतरही अत्यंत प्राथमिक आणि गरजेच्या असलेल्या स्मशानभूमीच्या सुविधेस मुकले आहे. सुमारे ५० उंबरठ्यांचे आणि २५० लोकसंख्येचे हे गाव चारही बाजूंनी घनदाट जंगल आणि डोंगरांनी वेढलेले आहे. गावातील बहुतांश लोकांचा मुख्य व्यवसाय शेती आहे. मात्र, वन्य प्राण्यांचा प्रचंड त्रास असल्यामुळे शेती करणे अवघड झाले आहे. परिणामी, अनेक तरुण आणि मध्यमवयीन कुटुंबे रोजगाराच्या शोधात मुंबई आणि इतर शहरी भागांकडे स्थलांतरित झाली आहेत. आज गावात मुख्यतः वृद्धच नागरिक राहिले आहेत.

अंत्यसंस्कारांसाठी एक किलोमीटरचा दुर्गम प्रवास 

या गावात वेळी किंवा जर रात्रीच्या पावसाळ्यात एखाद्याचे निधन झाले, तर गावकऱ्यांना मोठ्या कष्टाने एक किलोमीटर अंतर पार करून बांधा-बांधातून चिखल आणि अरुंद पायवाटांमधून मृतदेह शेतात न्यावा लागतो. अशा दुर्गम परिस्थितीतच त्या मृत व्यक्तीचे उघड्यावर अंत्यसंस्कार केले जातात. ही खूप मोठी शोकांतिका आहे. पावसाच्या धुवांधार सरी असोत वा रात्रीची काळोखाची वेळ, गावकऱ्यांना हीच कसरत करावी लागते. त्यामुळे मृत व्यक्तीच्या कुटुंबीयांसह संपूर्ण गावासाठी हा शेवटचा प्रवासही दुःखद आणि वेदनादायी ठरतो. ग्रामस्थांनी प्रशासन आणि लोकप्रतिनिधींकडे आपल्या व्यथा व्यक्त करत एकच मागणी केली आहे की, गावाला तातडीने स्मशानभूमी बांधून मिळावी. मृत व्यक्तींचा शेवटचा प्रवास तरी सन्मानाने, सुरक्षित आणि व्यवस्थित पार पडावा, हीच आमची अपेक्षा आहे, असे ग्रामस्थांनी ठणकावून सांगितले.