ढेबेवाडी: वार्ताहर
माझी वसुंधरा अभियान ४.० स्पर्धेत राज्यात प्रथम क्रमांक पटकावलेल्या पाटण तालुक्यातील मान्याचीवाडी ग्रामपंचायतीचा शनिवारी मुंबई येथील कार्यक्रमात गौरव करण्यात आला. महाराष्ट्र राज्याचे महामहीम राज्यपाल आचार्य देवव्रत ,उपमुख्यमंत्री सुनेत्रा पवार, पर्यावरण मंत्री पंकजा मुंडे, मुख्य सचिव राजेश अग्रवाल, विधानसभा अध्यक्ष राहुल नार्वेकर, पर्यावरण विभागाच्या सचिव जयश्री भोज आदिंच्या उपस्थितीत हा सन्मान करण्यात आला. मान्याचीवाडी ग्रामपंचायतीचे सरपंच रवींद्र माने, सदस्य दिलीप गुंजाळकर, उत्तमराव माने, पोलीस पाटील विकास माने, अधिकराव माने, इंदुमती माने, सुरेखा माने, पवणजीत माने, रमेश गुंजाळकर आदिंनी हा पुरस्कार स्वीकारला.
राज्य शासनाच्या पर्यावरण आणि वातावरणीय बदल विभागाच्या माध्यमातून घेण्यात आलेल्या माझी वसुंधरा अभियान स्पर्धेत पाटण तालुक्यातील मान्याचीवाडी ग्रामपंचायतीने राज्यात प्रथम क्रमांक पटकावला.
मान्याची वाडी ग्रामपंचायतीने या स्पर्धेत सलग तिसऱ्या वर्षी बाजी मारून हॅट्रिक केली आहे.
ही स्पर्धा ग्रामीण आणि शहरी विभागातील स्थानिक स्वराज्य संस्थेच्या माध्यमातून राबवली जाते. पृथ्वी, अग्नी, वायू, जल, आकाश या पंचतत्त्वावर या स्पर्धेचे मूल्यांकन केले जाते. यामध्ये स्थानिक स्वराज्य संस्थेने केलेल्या कामाची पाहणी करण्यात येते. सन 2023 -24 या कालावधीमध्ये ग्रामपंचायतीच्या माध्यमातून गाव परिसरामध्ये केलेले वृक्षारोपण त्याचबरोबर जुन्या झाडांचे संगोपन, रूप टॉप वॉटर हार्वेस्टिंग, पर्यावरणीय दृष्ट्या प्रबोधन आणि जनजागृती, अपारंपारिक ऊर्जा, बायोगॅस, सौर पंप, सौर ऊर्जा त्याचबरोबर ई- वेहिकल, ई- चार्जिंग सेंटर, कंपोस्ट खत, ओला कचरा, सुका कचरा यावरती प्रक्रिया आदी बाबींवर मूल्यांकन केले जाते.
या ग्रामपंचायतीने अपारंपारिक ऊर्जा विकास मध्ये काम करताना महाराष्ट्रातले पहिले सौर ग्राम म्हणून बहुमान मिळवला आहे. माझी वसुंधरा स्पर्धेमध्ये मान्याचीवाडीने सलग तिसऱ्या वर्षी बाजी मारून एक कोटी रुपयांच्या पुरस्कारासह या स्पर्धेत हॅट्रिक मिळवली आहे. या यशाबद्दल पालकमंत्री शंभूराज देसाई, जिल्हा परिषदेच्या मुख्य कार्यकारी अधिकारी याशनी नागराजन, जिल्हाधिकारी संतोष पाटील,उपमुख्य कार्यकारी अधिकारी राहुल देसाई, गटविकास अधिकारी सरिता पवार आदिंनी अभिनंदन केले.
कोणत्याही टिप्पण्या नाहीत:
टिप्पणी पोस्ट करा