“समर्थनात मिळालेल्या व विरोधात पडलेल्या प्रत्येक मताचा सन्मान जनसेवेच्या माध्यमातून राखला जाईल” - मृणालताई महेश पाटील.“मी तुमची लेक आहे…” — शब्द नव्हते ते नातं होतं; मंद्रुळकोळेत मृणालताईंचा ऐतिहासिक विजय

“मी तुमची लेक आहे…” — शब्द नव्हते ते नातं होतं; मंद्रुळकोळेत मृणालताईंचा ऐतिहासिक विजय

“समर्थनात मिळालेल्या व विरोधात पडलेल्या प्रत्येक मताचा सन्मान जनसेवेच्या माध्यमातून राखला जाईल” — हा केवळ निवडणूकपश्चात दिलेला शब्द नव्हता, तर मंद्रुळकोळे गटातील जनतेशी बांधलेलं एक पवित्र नातं होतं.आणि या नात्यालाच जनतेनं मतांच्या रूपाने कौल दिला.

मंद्रुळकोळे जिल्हा परिषद गटातून शिवसेनेच्या अधिकृत उमेदवार यांनी मिळवलेला विजय हा आकड्यांचा नव्हता, तर विश्वासाचा, भावनेचा आणि लेकीवर ठेवलेल्या भरोशाचा विजय होता.
जिल्हा परिषदेत निवडून गेलेल्या सर्वात कमी वयाच्या महिला उमेदवार म्हणून मृणालताईंनी इतिहास रचला आणि भाजपच्या तगड्या उमेदवार प्राची नरेंद्र पाटील यांना पराभवाचा धक्का दिला.

मतदान नव्हतं, आशेचं दान होतं…

साप्ताहिक कुमजाई पर्व न्यूजशी संवाद साधताना मृणालताई म्हणाल्या,
“जनतेनं मला दिलेली संधी मी आयुष्यभर जपणार आहे. माझ्या बाजूने पडलेलं असो वा विरोधात — प्रत्येक मत माझ्यासाठी तितकंच पवित्र आहे. त्या प्रत्येक मताचा सन्मान मी माझ्या कामातून करेन.”

हे शब्द ऐकताना अनेकांच्या डोळ्यांत पाणी तरळलं — कारण जनतेनंही या निवडणुकीत मत नव्हे, तर आपली अपेक्षा, आपलं भविष्य आणि आपली लेक मतपेटीत टाकली होती.

विकासाच्या वाटेवरची लेक

पालकमंत्री यांच्या नेतृत्वाखाली या भागात कोट्यवधी रुपयांची विकासकामे झाली. रस्ते, पाणी, शिक्षण, आरोग्य — विकासाची पायाभरणी मजबूत झाली.
“बरंच काम झालं आहे, काही कामं सुरू आहेत आणि जे अपूर्ण आहे ते पूर्ण करणं हीच माझी खरी कसोटी आहे,” असे सांगताना मृणालताईंच्या शब्दांत आत्मविश्वासही होता आणि जबाबदारीची जाणीवही.

वडिलांचा संस्कार, लेकीचा संकल्प

या विजयामागे मृणालताईंचे वडील उद्योजक महेश पाटील यांची निस्वार्थ सेवा, प्रचंड लोकसंपर्क आणि सामाजिक बांधिलकी भक्कम आधार ठरली.
“आजपर्यंत माझ्या वडिलांनी या भागातील जनतेची सेवा केली, कोणताही स्वार्थ न ठेवता. त्या सेवेची परंपरा पुढे नेणं हीच माझी खरी ओळख असेल,” असे सांगताना मृणालताईंचा स्वर क्षणभर थरथरला.

“मी फक्त बनपुरीची लेक नाही…”

निवडणूक प्रचारादरम्यान मृणालताईंनी केलेलं आवाहन आजही प्रत्येक घरात चर्चेचा विषय आहे —
“मी आता फक्त महेश पाटलांची किंवा बनपुरीची लेक राहिलेली नाही. मी या संपूर्ण विभागाची लेक म्हणून तुमच्यासमोर उभी आहे. लेकीलाच आईवडिलांच्या घराची काळजी असते… मला सेवेची संधी द्या.”

या शब्दांनी मंद्रुळकोळे गटातील मने जिंकली.

मंत्र्यांची साद आणि जनतेचा हुंकार

या भावनिक लढ्यात पालकमंत्री शंभूराज देसाई यांनी दिलेली साद निर्णायक ठरली —
“एक वेळ मला विधानसभेला मतदान करू नका, पण गट-तट विसरून तुमच्या लेकीच्या पाठीशी उभे राहा,” असे आवाहन त्यांनी केलं.
आणि जनतेनं ते मनावर घेतलं.

हा विजय एका घराचा नाही, संपूर्ण गटाचा आहे

भरघोस मतांनी विजयी केल्याबद्दल मृणालताईंनी मंद्रुळकोळे गटातील मतदार बंधू-भगिनींचे हात जोडून आभार मानले.
हा विजय सत्ता मिळवण्याचा नसून सेवेची जबाबदारी स्वीकारण्याचा आहे.

आज मंद्रुळकोळे गटात एक नवा विश्वास उगवला आहे —
लेक जिंकली आहे… आणि लेक कधीही आपल्या माणसांना विसरत नाही