विकासाचा मुद्दा घेऊन निवडणुकीला सामोरे जाणार!- शंभूराज देसाई यांचे प्रतिपादन पाटणमध्ये केलेल्या विकासकामांची पोचपावती मतदानाच्या रूपात देण्याचे शंभूराज देसाई यांचे आवाहन मल्हारपेठ नाडे विभागाचा संवाद मेळावा संपन्न.

 

विकासाचा मुद्दा घेऊन निवडणुकीला सामोरे जाणार!- शंभूराज देसाई यांचे प्रतिपादन

पाटणमध्ये केलेल्या विकासकामांची पोचपावती मतदानाच्या रूपात देण्याचे शंभूराज देसाई यांचे आवाहन

मल्हारपेठ नाडे विभागाचा संवाद मेळावा संपन्न.

 

 

" साप्ताहिक कुमजाई पर्व न्यूज "

मल्हारपेठ बुधवार, दि. २४ ऑक्टोबर  : महाराष्ट्र विधानसभा निवडणूक - २०२४ साठी शिवसेना पक्षाची अधिकृत उमेदवारी जाहीर झाल्यानंतर बुधवारपासून पाटण विधानसभा मतदारसंघात शंभूराज देसाई यांच्या जाहीर संवाद मेळाव्यास सुरुवात झाली आहे. कार्यकर्ते, पदाधिकारी आणि ग्रामस्थांच्या प्रचंड उपस्थितीत मल्हारपेठ विभागामध्ये बुधवारी शंभूराज देसाई यांच्या प्रमुख उपस्थितीत जाहीर संवाद मेळावा संपन्न झाला. यावेळी विरोधकांकडे विरोध करण्यासाठी कोणताही मुद्दा नसल्याने बिनबुडाचे आरोप करत आहेत, तसेच त्यांचे 'फेक नॅरेटिव्ह' खोडून काढण्याचे काम कार्यकर्त्यांनी करावे, असे आवाहन शंभूराज देसाई यांनी केले. तसेच विकासाचा मुद्दा घेऊन निवडणुकीला सामोरे जाणार असून पाटणमध्ये केलेल्या विकास कामांची पोचपावती मतदानाच्या रूपात देण्याचे आवाहन ना.शंभूराज देसाई यांनी यावेळी मतदारांना केले. 

            पाटण विधानसभा मतदारसंघातील मल्हारपेठ व नाडे विभागातील कार्यकर्त्यांचा बुधवारी ना.शंभूराज देसाई यांचा जाहीर संवाद मेळावा मल्हारपेठ येथे आयोजित करण्यात आला होता. यावेळी आर.बी.पवार, विश्वनाथ पानस्कर, विजय पवार,किरण दशवंत, सुनील पानस्कर, विजय शिंदे, अशोक डिगे,पांडरंग नलवडे,शशिकांत निकम,राजकुमार कदम,सुनील पानस्कर,विजयराव देशमुख,पांडूरंग शिरवाडकर,उत्तमराव मोळावडे,प्रकाश पवार,नाथा जाधव,विजय सरगडे यांचेसह पदाधिकारी, कार्यकर्त्यांसह ग्रामस्थ बंधू-भगिनी मोठ्या संख्येने उपस्थित होते. यावेळी सर्वांनी विधानसभा निवडणुकीत ना.शंभूराज देसाई यांच्या विक्रमी मतांनी विजयाचा निर्धार व्यक्त केला. तसेच यावेळी मल्हारपेठ विभागातील मातंग समाजातील कार्यकर्ते बंधू-भगिनींनी ना.शंभूराज देसाई यांच्या उपस्थितीत शिवसेना पक्षात प्रवेश केला. 

               यावेळी ना. शंभूराज देसाई यांनी उपस्थितांशी संवाद साधला. याप्रसंगी ते म्हणाले की, पाटण विधानसभा मतदारसंघात केलेल्या विकासकामांचे दाखले माझे कार्यकर्ते मतदारांना देतील. तसेच वाड्यामध्ये अडकलेली आमदारकी सर्वसामान्यांमध्ये आणण्याचा प्रयत्न माझ्या रूपाने पाटणवासियांनी केला. गेल्या पाच वर्षांत ०२ हजार ९10 कोटी रुपयांची कामे पाटण विधानसभा मतदारसंघात केल्याचे शंभूराज देसाई यांनी यावेळी सांगितले. पाटणवासियांच्या अडचणीच्या काळात विरोधक कुठेही फिरकले नाहीत आणि आता निवडणुकीच्या काळात ते सर्वांच्या दरवाज्यावर जाताहेत. ज्या ग्रामपंचायतीमधून माझ्यावर त्यांनी टिका केली, ती ग्रामपंचायतसुद्धा आता त्यांच्या ताब्यात राहिलेली नाही,अशा शब्दांत शंभूराज देसाई यांनी पाटणकरांच्या निष्क्रियतेवर बोट ठेवले.   

               तसेच आम्ही विकासकामांमध्ये कधीही गटातटाचे राजकारण केले नाही. पाटणमध्ये ग्रामीण रुग्णालयाचे उपजिल्हा रुग्णालयात रूपांतर केले. पाटणमध्ये पोलिस प्रशिक्षण केंद्राची मंजुरी घेतली असून, लवकरच त्याचे काम सुरू होणार असल्याची माहिती शंभूराज देसाई यांनी याप्रसंगी उपस्थितांना दिली. पाटण विधानसभा मतदारसंघात केलेल्या विकासकामांच्या जोरावर ही निवडणूक लढवण्याचा निर्धार शंभूराज देसाई यांनी प्रसंगी बोलून दाखवला आणि विकासाला मतदान करण्याचे आवाहन त्यांनी उपस्थितांना केले.

विकासाला मतदान करण्याचे शंभूराज देसाई यांचे पाटणवासियांना आवाहन.कुंभारगाव आणि मंद्रुळकोळे जिल्हा परिषद गटात मेळावे संपन्न.

 समृद्ध महाराष्ट्रात समृद्ध पाटण घडवायचे आहे ! - शंभूराज देसाई यांचे प्रतिपादन

विकासाला मतदान करण्याचे शंभूराज देसाई यांचे पाटणवासियांना आवाहन

पाटण मतदारसंघात शंभूराज देसाई यांच्या जाहीर संवाद मेळाव्यांना सुरुवात.

कुंभारगाव आणि मंद्रुळकोळे जिल्हा परिषद गटात मेळावे संपन्न

 

 

पाटण

साप्ताहिक कुमजाई पर्व न्यूज

(बुधवार, दि. २३ ऑक्टोबर २०२४) : महाराष्ट्र विधानसभा निवडणूक - २०२४ साठी शिवसेना पक्षाची अधिकृत उमेदवारी जाहीर झाल्यानंतर बुधवारपासून पाटण विधानसभा मतदारसंघात शंभूराज देसाई यांच्या जाहीर संवाद मेळाव्यांस सुरुवात झाली आहे. कार्यकर्ते, पदाधिकारी आणि ग्रामस्थांच्या तुडुंब उपस्थितीत कुंभारगाव आणि मंद्रुळकोळे या जिल्हा परिषद गटांमध्ये बुधवारी शंभूराज देसाई यांच्या प्रमुख उपस्थितीत जाहीर संवाद मेळावे संपन्न झाले. यावेळी निवडणुका आल्यावर जे घराबाहेर पडतात, त्यांना ओळखा. सर्वसामान्यांची जाण असणाऱ्या उमेदवाराला विधानसभा निवडणुकीत पाठिंबा द्या, असे सांगत विकासाच्या मुद्द्यावर मतदान करण्याचे आवाहन शंभूराज देसाई यांनी मतदारांना केले.

पाटण विधानसभा मतदारसंघातील कुंभारगाव जिल्हा परिषद गटातील गुढे येथे व मंद्रुळकोळे जिल्हा परिषद गटातील ढेबेवाडी येथे बुधवारी शंभूराज देसाई यांचे जाहीर संवाद मेळावे आयोजित करण्यात आले होते. यावेळी डॉ. दिलीपराव चव्हाण, पंजाबराव देसाई, विलास गोडांबे, अनिल शिंदे, धनाजी गुजर, मधुकर पाटील, दत्ता चोरगे, मनोज मोहिते, अंकुश महाडिक, जोतीराज काळे, रणजित पाटील, शिवाजी शेवाळे, विकास गिरीगोसावी, नाना साबळे, मनोज पाटील, संभाजी चव्हाण, सचिन यादव, प्रभाकर शेलार, सागर नलवडे आदी पदाधिकारी, कार्यकर्त्यांसह ग्रामस्थ बंधू-भगिनी मोठ्या संख्येने उपस्थित होते. यावेळी सर्वांनी विधानसभा निवडणुकीत शंभूराज देसाई यांच्या विक्रमी मतांनी विजयाचा निर्धार व्यक्त केला.

यावेळी शंभूराज देसाई यांनी उपस्थितांशी संवाद साधला. याप्रसंगी ते म्हणाले की, आत्ताचा मतदारराजा हा जागृत आहे. त्याला मतदारसंघात कोणी विकासकामे केली आणि कोणी केली नाही, याची पुरेपूर जाणीव आहे. त्यामुळे यावेळी मतदार भूलथापांना बळी पडणार नाहीत, याची काळजी सर्वांनी घेणे गरजेचे आहे. आजवर पाटण मतदारसंघाचा विकास हेच एकमेव ध्येय ठेवून काम केले आहे. मतदारसंघात विविध विकासकामे मार्गी लावली आहेत. येणाऱ्या काळात पाटण मतदारसंघाला विकासकामाच्या बाबतीत महाराष्ट्रात पहिल्या क्रमांकावर आणायचे आहे, असा विश्वास शंभूराज देसाई यांनी यावेळी व्यक्त केला.

यावेळी आगामी निवडणुकीच्या पार्श्वभूमीवर शंभूराज देसाई यांनी कार्यकर्त्यांना मार्गदर्शन केले. पाटण विधानसभा मतदारसंघातील शेवटचे मत मतपेटीमध्ये जोपर्यंत पडत नाही, तोपर्यंत कार्यकर्ते आणि पदाधिकाऱ्यांनी स्वस्थ बसू नये, अशी सूचना शंभूराज देसाई यांनी सर्व पदाधिकारी व कार्यकर्ते यांना दिली. तसेच तालुक्यासाठी दिवसरात्र झटणारा सर्वसामान्य कार्यकर्ता म्हणून आजवर काम केले आहे. समृद्ध महाराष्ट्रात समृद्ध पाटण घडवण्याचे आमचे स्वप्न आहे. त्यासाठी येणाऱ्या निवडणुकीत आम्हाला साथ देऊन विधानसभेत पुन्हा प्रतिनिधीत्व करण्याची संधी द्या, असे आवाहन शंभूराज देसाई यांनी यावेळी मतदारांना केले. तसेच यावेळी त्यांनी विरोधकांनाही टोले लगावले. विरोधकांनी डोंगरावर पवनचक्की उभारण्याच्या नावाखाली स्वत:चाच लाभ करून घेतल्याचे देसाई यांनी यावेळी सांगितले. मात्र, जिथे कधीकाळी सायकल जाऊ शकत नव्हती, तिथे आता चारचाकी गाड्या पोहोचण्यासारखे गुळगुळीत रस्ते आमच्या कार्यकाळात तयार झाले आहेत. त्यामुळे बोलण्यापेक्षा विकासकामांवर भर देण्याची आमची भूमिका राहिली असून पाटणचा विकास करू शकेल अशा नेत्यालाच विधानसभेत पाठवावे लागेल, हे मतदारांनी लक्षात ठेवणे गरजेचे आहे. तसेच 'मुख्यमंत्री माझी लाडकी बहीण योजना' राज्यात मुख्यमंत्री एकनाथ शिंदे यांनी यशस्वी केली आणि पाच हप्ते मायभगिनींच्या खात्यात जमा झाल्याचे सांगत, यावेळी विकासाला मतदान करण्याचे आवाहन शंभूराज देसाई यांनी सर्व उपस्थितांना केले.

वाढदिनीच अक्षय माने ने उचलंल टोकाचं पाऊल..; मृतदेहाजवळ भिंतीवर विटेच्या तुकड्यानं लिहिलं होतं 'सॉरी'

वाढदिनीच अक्षय माने ने उचलंल टोकाचं पाऊल..; मृतदेहाजवळ भिंतीवर विटेच्या तुकड्यानं लिहिलं होतं 'सॉरी'

ढेबेवाडी : वाढदिनीच युवकाने गळफास घेऊन आत्महत्या केल्याची घटना काल रात्री नाईकबानगर (बनपुरी, ता.पाटण) येथे उघडकीस आली. अक्षय अशोक माने उर्फ बंडा (वय २७) असे संबंधित युवकाचे नाव आहे. ढेबेवाडी पोलिस ठाण्यात या घटनेची नोंद झाली आहे. आत्महत्येचे कारण समजू शकले नाही.

याबाबत ढेबेवाडी पोलिसांकडून मिळालेली  माहिती अशी,की  नाईकबानगर (बनपुरी) येथील अक्षय माने याचा श्री क्षेत्र नाईकबा येथे पूजेचे साहित्य विक्रीचा व्यवसाय आहे. काल अक्षयचा वाढदिवस होता. वाढदिवस साजरा करण्याचे नियोजनही घरात सुरू होते. मात्र, दुपारनंतर अक्षय मोबाईलला रेंज मिळत नसल्याने बाहेर जाऊन येतो, असे सांगून घरातून निघून गेला. मात्र, बराच वेळ होऊनही तो न परतल्याने कुटुंबीयांनी मोबाईलवरून त्याच्याशी संपर्क साधण्याचा प्रयत्न केला.

संपर्क होत नसल्याने कुटुंबीय व ग्रामस्थांनी त्या परिसरात शोधाशोध करण्यास सुरुवात केल्यावर रात्री आठच्या सुमारास जवळच असलेल्या नाईकबा- अंबवडे खुर्द रस्त्यानजीकच्या पडक्या घरात दोरीने गळफास घेतलेल्या स्थितीत अक्षयचा मृतदेह आढळून आला. घटनास्थळी भिंतीवर विटेच्या तुकड्याने 'सॉरी' लिहिल्याचेही आढळले. अक्षयचा परिसरात चांगला लोकसंपर्क असून, त्याने वाढदिनी उचललेल्या या टोकाच्या पावलामुळे अनेकांना मोठा धक्का बसला. 

उत्तरीय तपासणीनंतर अक्षयचा मृतदेह नातेवाइकांच्या ताब्यात देण्यात आला. काल सकाळी नाईकबानगर येथे अंत्यसंस्कार करण्यात आले. अक्षयच्या मागे आई, वडील, भाऊ, बहीण असा परिवार आहे. बंडा नावाने तो परिसरात परिचित होता. घटनास्थळी सहायक पोलिस निरीक्षक डॉ. प्रवीण दाईंगडे, पोलिस उपनिरीक्षक गणेश भोसले, संजय थोरात, पोलिस पाटील दत्तात्रय कुंभार आदींनी भेट दिली. आत्महत्येचे नेमके कारण समजू शकले नाही.

ढेबेवाडी फाट्याजवळ शस्त्रधारी टोळक्याने कारमधून हवालाची 3 कोटींची रक्कम लुटली,

ढेबेवाडी फाट्याजवळ शस्त्रधारी टोळक्याने कारमधून हवालाची 3 कोटींची रक्कम लुटली, 

       संग्रहित चित्र

मलकापूरातील ढेबेवाडी फाटा येथे शस्त्रधारी पाच जणांच्या टोळक्याने कारमधील 3 कोटींची रक्कम लुटली. मंगळवारी पहाटे पाचच्या सुमारास ही घटना घडली. लुटलेली रक्कम हवाला मार्फत मुंबईहून दक्षिण भारतात नेली जात होती, अशी माहिती पोलिसांनी दिली. या घटनेमुळे सातारा जिल्ह्यात एकाच खळबळ उडाली असून मोठ्या रकमेची लूट होवूनही रात्री उशिरापर्यंत पोलिसात गुन्हा नोंद झाला नव्हता. फिर्यादीकडेही कसून चौकशी सुरू असून फिर्याद घेण्याचे काम रात्री उशिरापर्यंत सुरू होते.

याबाबत पोलिसांनी दिलेली माहिती अशी की, मुबंईला हवाल्याने पैसे पोचविणाऱ्या कंपनीचा काऱभार दक्षिण भारतात मोठ्या शहरात आहे. संबंधित कंपनीची कार सुमारे 3 कोटींची रक्कम घेऊन सोमवारी रात्री मुंबईहून दक्षिण भारतात पैसे पोच करण्यासाठी निघाली होती. ती कार निघाली होती. मंगळवारी पहाटे पाचच्या सुमारास कार कराडमध्ये आली. मलकापूर येथील ढेबेवाडी फाट्यावर कारला वाहन आडवे मारून ती अडविण्यात आली.

त्या कारमधून पाच ते सहा जण उतरले. त्यांच्याकडे पिस्तुलांसह धारदार शस्त्रे होती. त्याचा धाक दाखवून त्यांनी कारमधील सुमारे 3 कोटींची रक्कम लंपास केली. ती रक्कम घेवून ते मुंबईच्या दिशेने पळाल्याची माहिती पोलिसांना मिळाली. त्यानुसार पोलिसांची तपासाची सुत्रे हलली आहे. त्यानुसार चौघांना ताब्यात घेतले असून त्यांच्याकडे कसून चौकशी सुरू आहे. यातील मुख्य सुत्रधार अद्यापही पोलासांच्या हाती लागलेला नाही. उद्यापर्यंत यातील रक्कम व संशयीत अटक होण्याची शक्यता पोलिसांनी वर्तवली आहे.

दरम्यान, महामार्गावर झालेल्या मोठ्या लुटीमुळे अतिरिक्त पोलिस अधीक्षक डॉ. वैशाली कडुकर येथे तळ ठोकून होत्या. पोलिस उपाधीक्षक अमोल ठाकूर, पोलिस निरिक्षक राम ताशीलदार यांच्यासह डीबी, एलसीबीच्या व पोलिस उपाधीक्षकांच्या पथकाने तपासाची सुत्रे हलवली. पोलिसांनी परिसरातील सीसीटिव्ही तपासले असून त्यानुसार आधारावर तपासाला गती दिली आहे. चोरी प्रकरणात पोलिसांनी चौघांना ताब्यात घेतले आहे. त्यांच्याकडे कसून चौकशी सुरू आहे.

महाराष्ट्र विधानसभा निवडणुका जाहीर; 'या' दिवशी होणार मतदान.

 महाराष्ट्र विधानसभा निवडणुका जाहीर; 'या' दिवशी होणार मतदान.

 

 

महाराष्ट्रात एका टप्प्यात विधानसभा निवडणुक होणार आहे. आज दि. १५ ऑक्टोबर रोजी मुख्य निवडणुक आयुक्त राजीव कुमार यांनी महाराष्ट्र विधानसभा निवडणूकीची तारीख जाहिर केली. महाराष्ट्रात दि.२० नोव्हेंबरला मतदान होणार असून दि. २३ नोव्हेंबरला मतमोजणी होणार आहे.

महाराष्ट्रात ३६ जिल्ह्यातील विधानसभांसाठी निवडणूक कार्यक्रम जाहिर झाला आहे. दि. २६ नोव्हेंबर रोजी विधानसभेचा कार्यकाळ संपत असून विधानसभा निवडणूकीकडे सर्वांचे वेध लागले होते. त्यातच मुख्य निवडणूक आयुक्त राजीव कुमार यांनी विधानसभा निवडणूकीचा कार्यक्रम जाहिर केला आहे. तरी उमेदवारांना दि. १८ ऑक्टोंबरपासून दि. २९ ऑक्टोबर पर्यंत अर्ज भरता येणार आहे. त्यानंतर दि. ३० ऑक्टोबर रोजी अर्जाची छाननी होणार आहे. तसेच उमेदवारांना दि. ४ नोव्हेबरपर्यंत अर्ज भरता येणार आहे. त्याचबरोबर दि. २० नोव्हेंबरला मतदान होणार असून दि. २३ नोव्हेंबरला मतमोजणी होणार आहे.

टाटा समुहाचे सर्वेसर्वा रतन टाटा यांचे निधन

टाटा समुहाचे सर्वेसर्वा रतन टाटा यांचे निधन.

टाटा उद्योगसमुहाचे प्रमुख रतन टाटा यांची प्रकृती चिंताजनक असल्यामुळे त्यांना ब्रीज कँडी रुग्णालयात दाखल करण्यात आले होते. त्याच्यावर अतिदक्षता विभागात उपचार सुरू होते.

बुधवारी (दि.9) साडे अकरा वाजता त्यांचे निधन झाल्याची माहिती समोर आली आहे. टाटा यांनी वयाच्या 86 व्या वर्षी अखेरचा श्वास घेतला. त्याच्या निधनाने भारतासह जगभरातील उद्योगविश्वावर शोककळा पसरली आहे.

दोन दिवसांपुर्वी रक्तदाब कमी झाल्यामुळे त्यांना रुग्णालयात दाखल करण्यात आले होते. त्यावेळी सोशल मीडियावर अनेक पोस्ट व्हायरल होत होत्या. त्यानंतर 'काळजीचे कोणतेही कारण नाही. वैद्यकीय तपासणीसाठी त्यांना रुग्णालयात आणले गेले आहे' असे त्यांच्याकडून कळवण्यात आले होते. मात्र बुधवारी ब्रीज कँडी रुग्णालयात त्यांची प्राणज्योत मावळली आहे.

जिद्द, चिकाटी, व आत्मविश्वास हे गुण विद्यार्थ्यांच्याकडे असणे आवश्यक - मा.श्री.पी.एल केंडे.

 जिद्द, चिकाटी, व आत्मविश्वास हे गुण विद्यार्थ्यांच्याकडे असणे आवश्यक - मा.श्री.पी.एल केंडे. 

पाटण - जिद्द, चिकाटी, व आत्मविश्वास हे गुण विद्यार्थ्यांच्याकडे असणे आवश्यक आहे , तरच आजच्या स्पर्धेच्या युगात विद्यार्थी हा टिकून राहणार आहे, असे मत शिक्षक पालक सह विचार दरम्यान मोरणा शिक्षण संस्थेच्या शिवाजीराव देसाई विद्यालय सोनवडे या विद्यालयाचे मुख्याध्यापक मा.श्री.पी. एल. केंडे सर यांनी व्यक्त केले.
यावेळी इ.5 वी व इ.8 वी च्या विद्यार्थ्यांच्या पालकांची सहविचार सभा आयोजित करण्यात आलेली होती.
या सहविचार सभेचे प्रास्ताविक श्री.संतोष कदम सर यांनी केले , यावेळी स्पर्धा परीक्षा विभाग प्रमुख  कु.मणेर एस एस.यांनी मनोगत व्यक्त केले, यावेळी या पालक सभेला मोठ्या संख्येने पालक उपस्थित होते, शेवटी या पालक सभेचे आभार विद्यालयातील वरीष्ठ शिक्षक श्री.डोंगरे एस.एल.सर यांनी मानले.

*मोरणा शिक्षण संस्थेतील तीन अध्यापकांना नेशन बिल्डर अवॉर्ड 2024 प्रदान*

*मोरणा शिक्षण संस्थेतील तीन अध्यापकांना नेशन बिल्डर अवॉर्ड 2024 प्रदान* 

पाटण -  रोटरी क्लब ऑफ मुंबई साऊथ यांच्या वतीने 5सप्टेबर शिक्षक दिनाचे औचित्य साधून शिक्षण  क्षेत्रामध्ये उल्लेखणीय  काम केल्याबद्दल शिक्षकांचा गुणगौरव करून त्यांना रोटरी क्लब च्या माध्यमातून नेशन बिल्डर अवॉर्ड हा पुरस्कार देवून सन्मानित केले जाते, यावेळी त्यांनी मोरणा शिक्षण संस्थेतील श्री.संजयकुमार लालासो डोंगरे उप शिक्षक- शिवाजीराव देसाई विद्यालय सोनवडे, श्री.तुकाराम विष्णू शिंदे,उप शिक्षक- न्यू इंग्लिश स्कूल गोकुळ - धावडे व श्री.सचिन विलास कदम प्र.मुख्याध्यापक न्यू इंग्लिश स्कूल नाटोशी यांना नुकताच मुंबई येथे एस.एन.डी.टी कॉलेज मरीन ड्राईव्ह येथे  रोटरी क्लब ऑफ मुंबई चे नर्गीस गौर,प्राचार्य नवनाथ पानस्कर सर, तसेच रोटरी चे पदाधिकारी यांचे शुभ हस्ते प्रदान करण्यात आला,

या पुरस्काराबद्दल महाराष्ट्र राज्याचे राज्य उत्पादन शुल्क मंत्री त सातारा व ठाणे जिल्ह्याचे पालकमंत्री नामदार श्री.शंभूराज देसाई साहेब ,मोरणा शिक्षण संस्थेचे अध्यक्ष मा.श्री.रविराज देसाई दादा , लोकनेते बाळासाहेब देसाई सहकारी  साखर कारखान्याचे चेअरमन मा.श्री.यशराज देसाई दादा, युवा नेते, जयराज देसाई दादा , आदीत्यराज देसाई दादा, संस्थेचे सर्व संचालक मंडळ, विविध शाखेचे मुख्याध्यापक ,सर्व शिक्षक, शिक्षकेत्तर कर्मचारी वर्ग व आजी माजी विद्यार्थी यांनी त्यांचे अभिनंदन केले.

सेम टू सेम.! काय तो पेहराव, काय तो अभिनय, सगळंच एक नंबर.; 'धर्मवीर 2' मधील मंत्री शंभूराज देसाई, शहाजी बापूंचा लूक चर्चेत.

 

सेम टू सेम.! काय तो पेहराव, काय तो अभिनय, सगळंच एक नंबर.; 'धर्मवीर 2' मधील मंत्री शंभूराज देसाई, शहाजी बापूंचा लूक चर्चेत.

 

 

'धर्मवीर' आनंद दिघे यांच्यावर असलेल्या या चित्रपटानं लोकांच्या मनावर एक वेगळीच छाप सोडली. बॉक्स ऑफिसवर या चित्रपटाने चांगली कमाई केली. या चित्रपटाच्या भरघोस यशानंतर आता 'धर्मवीर 2' प्रेक्षकांच्या भेटीस आला आहे.

सध्या सगळीकडे याच सिनेमाची हवा पाहायला मिळत आहे. तिकीट बारीवर देखील चित्रपटाने चांगलाच गल्ला जमवला आहे.

यंदा हा चित्रपट मराठी सोबतच हिंदी भाषेतही प्रदर्शित करण्यात आला आहे. अभिनेता प्रसाद ओक पुन्हा एकदा 'धर्मवीर' आनंद दिघे यांच्या भूमिकेत दिसला आहे. तर प्रवीण तरडे यांनी या चित्रपटाचे दिग्दर्शन केले आहे. मुळात 'धर्मवीर 2' हा सिनेमा आनंद दिघे यांच्या जीवनात असला तरी, यंदा सिनेमात त्यांचे शिष्य आणि सध्याचे मुख्यमंत्री एकनाथ शिंदे यांचा प्रभाव जास्त पाहायला मिळतोय.

त्यामुळे चित्रपटात शिवसेनेत झालेल्या बंडाळीचीही दखल घेण्यात आली असून एकनाथ शिंदे यांनी हिंदुत्त्वाच्या मुद्द्यावरुनच हे बंड केल्याचं चित्रपटात दिसत आहे. या बंडाचा सीन चित्रपटात घेण्यात आलाय. त्यामुळे, शिंदेंसह सूरतमार्गे गुवाहटी गाठलेल्या 40 आमदारांपैकी काही आमदारांच्याही भूमिका चित्रपटात साकारण्यात आल्या आहेत.

गुहावटीला गेल्यानंतर तिथलं वर्णन काय झाडी काय डोंगर काय हॉटेल… असं एका कार्यकर्त्याला सांगतानाची एक ऑडिओ क्लिप व्हायरल झाली आणि शहाजी बापू पाटील चर्चेत आले. शहाजी बापू पाटील यांची भूमिका अभिनेता आनंद इंगळे यानं साकारली आहे. खऱ्या शहाजी बापू पाटलांनाही आनंद इंगळेला पाहिल्यानंतर आश्चर्य वाटलं असणार, इतपत त्याचा लुक खरा वाटतोय. तर, मंत्र्यांच्या देखील भूमिका सिनेमात अतिशय चांगल्या पद्धतीने दाखवण्यात आल्या आहे.

अभिनेता आनंद इंगळे यांनी शहाजी बापूंची भूमिका केलीय. शहाजी बापूंसारखी तब्येत, हलकीशी दाढी, थोडसं टक्कल आणि कपाळावर टीळा दिसून येतोय. त्यामुळे,’ धर्मवीर 2′ सिनेमात शहाजी बापूंचा डिक्टो रोल साकारल्याचं दिसून येतंय. काय तो पेहराव, काय तो अभिनय, सगळंच एक नंबर… असे म्हणत नेटीझन्सकडून आनंद इंगळे यांनी साकारलेल्या शहाजी बापूंच्या भूमिकेचं स्वागत केलं जातंय.

तसेच, मंत्री शंभूराज देसाई यांची भूमिका अभिजीत थीटे या अभिनेत्यानं साकारली आहे. शंभूराज देसाई यांचं जॅकेट, त्यांच्या कपाळावरचा टिळा. त्यांचा हेअरकट या गोष्टी अगदी सारख्या केल्यामुळं सिनेमातले शंभूराज देसाईही चर्चेचा विषय ठरतात.नेटीझन्सकडून अभिजीत थीटे या अभिनेत्यानं साकारलेल्या शंभूराज देसाईच्या भूमिकेचं स्वागत केलं जातंय.

 

कुंभारगावातील अंडी विक्रेत्याकडील लाखाची रोकड लुटणाऱ्या 3 आरोपींना पोलीसांनी ठोकल्या बेड्या.

 कुंभारगावातीलअंडी विक्रेत्याकडील लाखाची रोकड लुटणाऱ्या 3 आरोपींना पोलीसांनी ठोकल्या बेड्या.

 

 पाटण प्रतिनिधी । पाटण पोलिस ठाण्याच्या स्थानिक गुन्हे अन्वेषण शाखेच्या पथकाच्या वतीने जबरी चोरीतील 3 आरोपींना अटक करण्यात आली आहे. तसेच त्यांच्याकडुन गुन्ह्यात वापरण्यात आलेली मोटारसायकल, चाकु तसेच रोख रक्कम १ लाख ८१ हजार ४१० रुपये व चोरीस गेलेले २ मोबाईल फोन जप्त केले आहेत.

सुलतान अस्लम मुजावर (वय २५, रा. सोमवार पेठ कराड), मोहम्मद मीर परवेज (वय २४, रा. मुजावर कॉलनी कराड), अमन सलीम सयद (वय २५, रा. सोमवार पेठ कराड) अशी ताब्यात घेण्यात आलेल्या आरोपींची नावे आहेत. याबाबत पोलिसांकडून मिळालेली माहिती अशी की, दि.०६/०९/२०२४ रोजी एक आयशर ट्रक चिपळूण ते कुंभारगाव ता. पाटण येथे अंडी विकून त्याचे पैसे घेवून जात होता. यावेळी ३ अज्ञात चोरट्यांनी कोयना ते पाटण रोडवरील हॉटेल चायपणी येथे सदरचा टेम्पो अडवला. आणि यातील चालकावर चाकूने हल्ला करुन त्यास जखमी करुन टेम्पोमधील अंडीविक्रीचे मिळालेले रोख १ लाख ८१ हजार ४१० रुपये व २ मोबाईल जबरीने चोरुन नेले. याबाबतचा गुन्हा पाटण पोलीस ठाण्यात दाखल करण्यात आला होता.

गुन्हा दाखल करण्यात आल्यानंतर पोलीस अधीक्षक श्री. समीर शेख, अपर पोलीस अधीक्षक श्रीमती वैशाली कडुकर, उपविभागीय पोलीस अधिकारी श्री. विजय पाटील यांच्या सूचनेनुसार व मार्गदर्शनाखाली पाटण पोलीस ठाण्यातील तपास पथक व स्थानिक गुन्हे शाखेकचे तपास पथकाने घटनेचा अधिक तपास केला. तपास पथकास मिळालेल्या गोपनिय माहितीच्या आधारे दि. ०६/०९/२०२४ कोयना- पाटण रोडवर हॉटेल चायपानीजवळ ३ अज्ञातांनी एक आयशर टेम्पो अडवला. त्यातील चालकावर चाकून हल्ला करुन त्यातील रोख रक्कम व मोबाईल जबरदस्तीने चोरुन नेला.

या घटनेची अधिक माहिती घेत तपास पथकाने अज्ञात आरोपींचा शोध घेत दि. ०१/१०/२०२४ रोजी कराड परिसरातून सुलतान अस्लम मुजावर, मोहम्मद मीर परवेज, अमन सलीम सयद याला ताब्यात घेतले. यानंतर त्यांच्याकडे कसून चौकशी केल्यानंतर आरोपींनी गुन्ह्याची कबुली दिली. आरोपीच्या कबुलीनंतर त्यांचेकडुन गुन्ह्यात वापरलेली मोटारसायकल, चाकु तसेच रोख रक्कम व चोरीस गेलेले २ मोबाईल फोन पथकाने जप्त केली. या प्रकरणाचा पुढील तपास सपोनि संदिप कामत करत आहेत.

 

ढेबेवाडी पोलीसांची उल्लेखनीय कामगीरी.ढेबेवाडी पोलीस ठाणे हददीतील नागरीकांचे गहाळ हरवलेले 23 मोबाईल हस्तगत करुन मुळ मालकांना परत.

 ढेबेवाडी पोलीस ठाणे हददीतील नागरीकांचे गहाळ हरवलेले एकूण 3,60,000/- रुपये किंमतीचे एकूण 23 मोबाईल हस्तगत करुन मुळ मालकांना परत (ढेबेवाडी पोलीसांची उल्लेखनीय कामगीरी)

 

ढेबेवाडी पोलीस ठाणे हददीतील नागरीकांचे गहाळ हरवलेले मोबाईल यांची शोध मोहिम राबविने बाबत मा.श्री समिर शेख मा. पोलीस अधिक्षक सो सातारा यांनी सुचना दिल्या होत्या, त्या अनुशंगाने ढेबवाडी पालीस ठाणेचे सपोनि दाईंगडे यांनी नागरीकांचे मोबाईल शोध घेणे कामी पोलीस ठाणे अंतर्गत पोलीस अंमलदार यांचे पथक तयार करून त्यांना सुचना देण्यात आल्या होत्या त्या प्रामाणे पथकातील पोलीस अमंलदार यांनी सीईआयआर पोर्टल व इतर तांत्रिक माहितीच्या आधारे हरवलेल्या मोबाईल बाबतची माहिती प्रात्प करुन चिकाटीने व अथक परिश्रम करुन सदर ची मोहीम राबविल्याने ढेबेवाडी पोलीस ठाणे हददीतून नागरीकांचे हरवलेले 

गहाळ झालेले एकून 3,60,000/- रुपये किंमतीचे एकून 23 मोबाईल हस्तगत करणेत यश आलेले आहे. आज दि.04/10/2024 रोजी सपोनि दाईगडे ढेबेवाडी पोलीस ठाणे यांचे हस्ते मूळ तक्रार दारांना त्यांचे मोबाईचे परत करणेत आले. अशाच प्रकारे सातत्याने मोहीम राबविण्यात येणार असल्याचे ढेबेवाडी पोलीस ठाण्याचे प्रभारी सपोनि दाईगड यांनी सांगितले आहे.

सदरची कारवाई मा. समीर शेख पोलीस अधिक्षक सो सातारा, मा. श्रीमती डॉ. वैशाली कडुकर अप्पर पोलीस अधिक्षक सो सातारा, मा. विजय पाटील सो पोलीस उपअधिक्षक सो पाटण विभाग यांचे मार्गदर्शनाखाली ढेबेवाडी पोलीस ठाणेचे प्रभारी अधिकारी सपोनि दाईगडे, पोलीस उपनिरीक्षक श्री. भोसले. पो. हवा.283 मुळगावकर, पो हवा. 1409 कुंभार, पो हवा 1969 माने, मपोना 2353 दोडके, सायबर पोलीस ठाणेचे पोलीस कॉस्टेबल श्री महेश पवार, पोलीस कॉस्टेबल श्री शिवाजी आवळे, पोलीस कॉस्टेबल मानिक पाटील, पोलीस कॉस्टेबल गणेश किर्वे, पोलीस कॉस्टेबल अशोक निकम, पोलीस कॉस्टेबल सौरभ कांबळे मपोकों अश्विनी माने यांनी केलेली आहे.

 

गुरुवारी पाटणमध्ये राष्ट्रवादी काँग्रेस शरदचंद्र पवार पक्षाची बैठक.

 गुरुवारी पाटणमध्ये राष्ट्रवादी काँग्रेस शरदचंद्र पवार पक्षाची बैठक.

पाटण प्रतिनिधी: राष्ट्रवादी काँग्रेस शरदचंद्र पवार पक्षाच्या वतीने संपूर्ण राज्यभर ‘शिवस्वराज्य यात्रा’ काढण्यात आली आहे. ही यात्रा सोमवार दि. ७ सप्टेंबर २०२४ रोजी पाटण विधानसभा मतदारसंघ धडकणार आहे. पक्षाचे प्रदेशाध्यक्ष आ.जयंत पाटील यांच्या नेतृत्वाखाली प्रमुख मान्यवरांच्या उपस्थितीत ही यात्रा पाटणमध्ये दाखल होणार आहे. या यात्रेचे  नियोजन करण्यासंदर्भात राष्ट्रवादी काँग्रेस पक्ष शरदचंद्र पवार पक्षाची नियोजन बैठक गुरुवार दि. ३ सप्टेंबर रोजी पाटण येथील सरदार पाटणकर वाड्यातील श्रीराम मंदिर येथे दुपारी १ वा. होणार आहे. अशी माहिती पक्षाचे पाटण विधानसभा मतदारसंघाचे अध्यक्ष राजाभाऊ शेलार यांनी प्रसिद्धी पत्रकाद्वारे दिली. तरी या बैठकीस पक्षाचे सर्व आजी/माजी पदाधिकारी,  जि.प.सदस्य,  पं.स.सदस्य, सर्व संस्थाचे चेअरमन, व्हॉ. चेअरमन, संचालक, नगराध्यक्ष, उपनगराध्यक्ष, नगरसेवक/नगरसेविका, सरपंच, उपसरपंच, ग्रामपंचायत सदस्य, बुथ प्रमुख व कार्यकर्ते यांनी वेळेवर उपस्थित रहावे असे आवाहन त्यांनी या प्रसिद्धी पत्रकाद्वारे केले आहे.

पालकमंत्री ना.शंभूराज देसाई यांचे प्रयत्नातून विविध विकास कामांसाठी 4 कोटी 84 लक्ष रुपयांचा निधी. स्थानिक व डोंगरी विकास निधी,लघु पाटबंधारे,स्मशानभूमी,क वर्ग तिर्थक्षेत्र व नागरी सुविधांची कामे लागणार मार्गी.

 पालकमंत्री ना.शंभूराज देसाई यांचे प्रयत्नातून विविध विकास कामांसाठी 4 कोटी 84 लक्ष रुपयांचा निधी.

 स्थानिक व डोंगरी विकास निधी,लघु पाटबंधारे,स्मशानभूमी,क वर्ग तिर्थक्षेत्र व नागरी सुविधांची कामे लागणार मार्गी.

 

 

पाटण दि.01:- पाटण विधानसभा मतदारसंघातील विविध गावांतील असणारी नागरी सुविधांची कामे तातडीने मंजूर होण्यासाठी पालकमंत्री ना.शंभूराज देसाई यांनी स्थानिक व डोंगरी विकास निधी,लघु पाटबंधाऱ्यांची कामे,स्मशानभूमी,क वर्ग तिर्थक्षेत्र विकास व नागरी सुविधांची कामे सन 2024-25 चे जिल्हा वार्षिक आराखडयामध्ये प्रस्तावित केली होती. त्यानुसार पालकमंत्री ना.शंभूराज देसाई यांचे प्रयत्नातून पाटण विधानसभा मतदारसंघातील विविध विकास कामांसाठी 4 कोटी 84 लक्ष 46 हजार रुपयांचा निधी मंजूर झाला असल्याची माहिती पालकमंत्री ना.शंभूराज देसाई यांचे कार्यालयाचेवतीने प्रसिध्दीपत्रकांत दिली आहे.

                प्रसिध्दीपत्रकांत पुढे म्हंटले आहे की, पाटण विधानसभा मतदारसंघातील विविध गावांत विकासाची कामांसाठी निधी होण्यासाठी संबंधित गावातील ग्रामस्थांनी पालकमंत्री ना.शंभूराज देसाई यांना भेटून मागणी केली होती.त्या-त्या गावातील महत्त्वाची असलेली विकास कामांना निधी मंजूर होण्यासाठी पालकमंत्री ना.शंभूराज देसाई यांनी ही कामे स्थानिक व डोंगरी विकास निधी,लघु पाटबंधाऱ्यांची कामे,जनसुविधा योजना,क वर्ग तिर्थक्षेत्र विकास व नागरी सुविधा योजना या योजनांमधून सन 2024-25 चे जिल्हा वार्षिक आराखडयामध्ये प्रस्तावित केली. त्यानुसार पालकमंत्री ना.शंभूराज देसाई यांचे प्रयत्नातून पाटण विधानसभा मतदारसंघातील विविध विकास कामांसाठी 4 कोटी 84 लक्ष 46 हजार रुपयांचा निधी मंजूर झाला असून स्थानिक विकास निधीमधून वजरोशी वाकेश्वर मंदिर रस्ता 20 लक्ष, मेंढोशी वरची अंतर्गत रस्ता सुधारणा 10 लक्ष, मोळावडेवाडी (कुठरे) येथे मारुती मंदिरासमोर सभामंडप 13 लक्ष, पाळशी सावंतवस्ती येथे सभामंडप 13 लक्ष, कराटे हनुमान मंदिर सभामंडप 13 लक्ष, ढोरोशी येथे सभामंडप 13 लक्ष, पाडळी येथे मुस्लिमवस्ती मध्ये शादीखाना 20 लक्ष, बेलदरे येथे रामोशी समाज सभामंडप 13 लक्ष, येरफळे बौध्दवस्तीमध्ये सभामंडप 13 लक्ष या कामांसाठी 01 कोटी 28 लाख तर डोंगरी विकास निधीतून मौजे साकुर्डी अंतर्गत रस्ता सुधारणा 8.28 लक्ष रुपयांचा निधी मंजूर झाला आहे. लघु पाटबंधारे विभागांतर्गत शेतीच्या पाण्याची सोय होण्यासाठी वन येथे साठवण हौद व शेतीसाठी पाण्याचा आडवा पाट 18.93 लक्ष, कळकेवाडी कुसरुंड येथे साठवण हौद व शेतीसाठी पाट 15.76 लक्ष, आचरेवाडी नं.2 येथील ग्रामतलाव दुरुस्ती 8.06 लक्ष, पाठवडे येथे शेतीसाठी आडवे पाट 15 लक्ष, पळासरी कुसवडे येथे साठवण हौद व शेतीसाठ पाण्याचे पाट 18 लक्ष, माईंगडेवाडी जिंती येथे वळण बंधारा दुरुस्ती व पाट पाईप लाईन 14.19 लक्ष, बाटेवाडी पाठवडे येथे शेतीचे आडवे पाट 15.04 लक्ष, दिक्षी थोरला ओढा येथे वळण बंधारा दुरुस्ती व पाट पाईप लाईन 15 लक्ष, येराड केळीचा ओढा येथे वळण बंधारा व पाट पाईप लाईन 19.20 लक्ष या कामांसाठी एकूण 1 कोटी 39 लक्ष 18 हजार रुपयांचा निधी मंजूर झाला आहे.तर क वर्ग तिर्थ क्षेत्र विकास योजनेमधून येराड येथे श्री येडोबा मंदिर परिसरात बाग बगीचासह सुधारणा 15 लक्ष, येराडवाडी येथे श्री रुद्रेश्वर मंदिर परिसर सुधारणा 10 लक्ष, विहे येथे श्री जोतिर्लिंग मंदिर परिसर सुधारणा 10 लक्ष या कामांसाठी एकूण 35 लक्ष तर मोठया ग्रामपंचायतींना नागरी सुविधा पुरविण्याच्या कामांमध्ये तांबवे अंतर्गत रस्ता सुधारणा 20 लक्ष, मल्हारपेठ दिंडुकलेवाडी वार्ड क्र. 3 अंतर्गत रस्ता सुधारणा 20 लक्ष, मंद्रुळकोळे अंतर्गत रस्ता सुधारणा 20 लक्ष, मल्हारपेठ येथे सातामा भाजी मंडई ते पवारआळी रस्ता सुधारणा 10 लक्ष, मल्हारपेठ येथे महादेव वार्ड क्र. 1 मधील अंतर्गत रस्ता सुधारणा 10 लक्ष, मल्हारपेठ येथे कराड चिपळूण रोड ते प्राथमिक आरोग्य केंद्राकडे जाणारा रस्ता 5 लक्ष व विहे येथे गावांतर्गत रस्ता 5 लक्ष असा एकूण 90 लक्ष रुयांचा निधी मंजूर झाला  आहे. तर जनसुविधा योजने अंतर्गत  विविध गावांतील स्मशानभूमींच्या कामांमध्ये मोडकवाडी जिंती स्मशानभूमी शेड व निवारा शेड 4 लक्ष, आंबळे येथे स्मशानभूमी 4 लक्ष, धनगरवाडी तारळे येथे स्मशानभूमी 4 लक्ष, राहुडे येथे स्मशानभूमी 4 लक्ष, केळेवाडी खालची कडवे येथे स्मशानभूमी 4 लक्ष, नाणेगाव खुर्द स्मशानभूमी 4 लक्ष, माथणेवाडी स्मशानभूमी शेड 4 लक्ष, आटोली स्मशानभूमी 4 लक्ष, सातेवाडी नाटोशी येथे स्मशानभूमी 4 लक्ष, कुसरुंड येथे स्मशानभूमी शेड 4 लक्ष, दिवशी खुर्द स्मशानभूमी 4 लक्ष, खाडेकरवाडी सोनवडे स्मशानभूमी 4 लक्ष, शिंदेवाडी स्मशानभूमी शेड 4 लक्ष, नवीवाडी जिंती येथे स्मशानभूमी 4 लक्ष, शिद्रुकवाडी काढणे स्मशानभूमी 4 लक्ष, मराठवाडी वरची स्मशानभूमी 4 लक्ष, किल्ले मोरगिरी स्मशानभूमी 4 लक्ष, मळा काढोली स्मशानभूमी 4 लक्ष, मणेरी  स्मशानभूमी सुधारणा 4 लक्ष, बेलवडे खुर्द स्मशानभूमी सुधारणा 4 लक्ष, घोट स्मशानभूमी सुधारणा 4  लक्ष या 21 स्मशानभूमींचे कामांसाठी 84 लक्ष असा एकूण  4 कोटी 84 लक्ष 46 हजार रुपयांचा निधी मंजूर झाला असल्याचे शेवटी प्रसिध्दीपत्रकांत म्हंटले आहे.