प्राईड ऑफ स्पंदन अवॉर्डसाठी प्रस्ताव पाठवण्याचे आवाहन

प्राईड ऑफ स्पंदन अवॉर्डसाठी प्रस्ताव पाठवण्याचे आवाहन

तळमावले/वार्ताहर

विविध क्षेत्रात आदर्श असलेल्या आणि सामाजिक जडणघडणीसाठी उल्लेखनीय योगदान देत असलेल्या व्यक्ती आणि संस्था यांना पाटण तालुक्यातील डाकेवाडी (काळगांव) येथील स्पंदन चॅरिटेबल ट्रस्ट महाराश्ट्र राज्य यांच्यावतीने राज्यस्तरीय प्राईड ऑफ स्पंदन या पुरस्काराने गौरवण्यात येते. या पुरस्कारासाठी प्रस्ताव पाठविण्याचे आवाहन स्पंदन चॅरिटेबल ट्रस्टचे संस्थापक अध्यक्ष डाॅ.संदीप डाकवे यांनी केले आहे. समाजासाठी अविरतपणे झटणाऱ्या सर्वसामान्यांमधील आदर्श व्यक्ती, संस्था, ट्रस्ट यांना पुरस्काराने सन्मानित करुन त्यांचे कार्य समाजापुढे आणण्यासाठी हे पुरस्कार देण्यात येतात. सदर पुरस्कार सोहळयाचे हे पाचवे वर्ष आहे. याच कार्यक्रमात दिवाळी अंक स्पर्धा, सेल्फी विथ गुढी स्पर्धा, सॅल्युट कार्ड स्पर्धा यामधील विजेत्यांचांही सन्मान केला जाणार आहे.

डाकेवाडी सारख्या दुर्गम भागात राहूनही डाॅ.संदीप डाकवे आणि त्यांचे सहकारी यांनी स्पंदन चॅरिटेबल ट्रस्टच्या माध्यमातून आतापर्यंत शेकडो नावीण्यपूर्ण उपक्रम राबवून आपल्या कामाची कर्तृत्वमुद्रा समाजमनावर उमटवली आहे. या कामाची दखल घेत स्पंदन चॅरिटेबल ट्रस्टला अनेक पुरस्कारांनी सन्मानित केले आहे. याशिवाय माजी राज्यपाल भगतसिंह कोश्यारी, छत्रपती संभाजीराजे, खा.श्रीनिवास पाटील, पालकमंत्री ना.शंभूराज देसाई, माजी जलसंपदा मंत्री जयंत पाटील, माजी शालेय शिक्षण मंत्री प्रा. वर्षाताई गायकवाड, आ.शिवेंद्रसिंहराजे भोंसले, आ.बाळासाहेब पाटील यासह अन्य मान्यवरांनी शुभसंदेश देवून ट्रस्टच्या कार्याचा गौरव केला आहे.

तरी सदर पुरस्कारासाठी इच्छुक व्यक्ती, संस्था, ट्रस्ट यांनी आपल्या नामांकनासह आपल्या क्षेत्रातील आपण केलेल्या कार्याचे फोटो, वृत्तमानपत्रातील बातम्यांची कात्रणे इ. साहित्याचे प्रस्ताव गुरुवार दि.30 मार्च, 2023 पर्यंत डाॅ.संदीप राजाराम डाकवे ‘राजनंदा प्राईड अपार्टमेंट’, फ्लॅट नं.8, होली फॅमिली काॅन्व्हेंट स्कुलच्या पाठीमागे, सैदापूर विद्यानगर, ता.कराड, जि.सातारा. 415124 येथे पोस्टाने अथवा कुरियरने पाठवावेत. आलेल्या नामांकनामधून निवड समितीने निवडलेल्या पुरस्कार्थींना एका भव्यदिव्य व शानदार कार्यक्रमात दिग्ग्ज मान्यवर, सेलिब्रिटी यांच्या हस्ते पुरस्कार देवून सन्मानित करण्यात येईल.

अधिक माहितीसाठी डाॅ.संदीप डाकवे मो.9764061633 या भ्रमणध्वनी क्रमांकावर संपर्क साधावा, असे आवाहन स्पंदन चॅरिटेबल ट्रस्टच्या वतीने प्रसिध्दीसाठी देण्यात आलेल्या पत्रकात म्हटले आहे.

चौकटीत :

स्पंदन जीवन गौरव पुरस्काराने मान्यवरांचा सन्मान :

अग्रलेखांचे बादशहा पद्मश्री नीलकंठ खाडीलकर (भाऊ), पद्मश्री डाॅ.विजय शहा, खा.श्रीनिवास पाटील, शिवसमर्थ समुहाचे शिल्पकार अॅड.जनार्दन बोत्रे यांना स्पंदन जीवन गौरव तर अभिनेत्री अश्विनी महांगडे, लावणीसम्राज्ञी विजया पालव, शिवव्याख्याते प्रा.डाॅ.अरुण घोडके, अभिनेते रवि साळुंखे, अभिनेता सुयश शिर्के, अभिनेत्री सुनंदा शेंडे, उद्योजक सर्जेराव यादव, उद्योजक सुरेश रांजवण यांसह अनेक मान्यवरांना यापूर्वी राज्यस्तरीय प्राईड ऑफ स्पंदन पुरस्काराने गौरवण्यात आले आहे.

जागर सामाजिक परिवर्तन संस्थेच्या वतीने विजेत्यांचा सन्मान

मालदन- जागर सामाजिक परिवर्तन संस्थेच्या वतीने विजेत्यांचा सन्मान

तळमावले/वार्ताहर

मालदन (ता.पाटण) येथील जागर सामाजिक परिवर्तन संस्था पर्यावरण आणि जैवविविधता यांचे सरंक्षण आणि संवर्धन व्हावे यासाठी वेळोवेळी उपक्रम राबवत असते. याच अनुशंगाने वन्यजीव आणि मानव संघर्ष कमी व्हावा, यावरती प्रबोधन व्हावे, विचारांचा जागर व्हावा म्हणून जागार सामाजिक संस्थेने वक्तृत्व स्पर्धा आयोजित केल्या होत्या. या स्पर्धेतील विजेत्यांना नुकतेच गौरवण्यात आले.

लहान गटामध्ये तुलसी बर्गे, अंजली जाधव, सिध्दी मोहिते यांनी अनुक्रमे प्रथम, व्दितीय आणि तृतीय क्रमांक पटकावले. तर मोठया गटात दिक्षा व्यवहारे, पियुष गायकवाड, आर्या गायकवाड यांनी अनुक्रमे प्रथम, व्दितीय आणि तृतीय क्रमांक पटकावले.

वन्यजीव आणि मानव संघर्ष हा वक्तृत्व स्पर्धेचा विषय होता. या उपक्रमास वनपरिमंडळ भोसगांव आणि छत्रपती शिवाजी मराठा हायस्कूल मालदन यांचे विशेष सहकार्य लाभले. सदर स्पर्धेसाठी विद्यार्थ्यांचा प्रतिसादही उल्लेखनीय होता.

यावेळी संस्थेचे संस्थापक अध्यक्ष श्रीकांत काळे यांनी निसर्ग संवर्धन आणि त्याबाबतची जागर सामाजिक परिवर्तन संस्थेची भूमिका मांडली. पर्यावरणाचा समतोल साधणे आणि जैवविविधतेचे संरक्षण ही काळाची गरज आहे. आपले अस्तित्व आणि आपल्या पुढाच्या पिढयांचे भविष्य यावरच अवलंबून आहे. तसेच ही सामुदायिक जबाबदारी असून सर्वांनी या चांगल्या कामी हातभार लावावा असे आवाहनही याप्रसंगी केले.

यशस्वी विद्यार्थ्यांचा रोख रक्कम, स्मृतीचिन्ह आणि सन्मानपत्र देवून सरपंच सौ.गितांजली काळे, उपसरपंच ज्योतिराज काळे, माजी सरपंच भिमराव गायकवाड, माजी सरपंच आबासोा काळे, छ.शिवाजी मराठा हायस्कूलचे मुख्याध्यापक वाघ सर, जि.प.शाळेचे मुख्याध्यापक महाडीक सर या मान्यवरांच्या हस्ते सत्कार करण्यात आला.

स्व.स्वातंत्र्यसैनिक पांडूरंग साळुंखे यांच्या स्मरणार्थ संस्थेचे मार्गदर्शक सदस्य श्री राजेश साळुंखे यांनी सर्व बक्षीसे दिली. स्पर्धेचे परीक्षण प्रा.रुबिना मुल्ला, प्राध्यापक सागर काळे, स्नेहल मोहिते आणि ग्रेटा डिसोझा यांनी केले.

सुत्रसंचालन संस्थेचे सदस्य अनिरुध्द पन्हाळे यांनी केेले तर आभारप्रदर्शन कृषी उद्योजक विजय काळे यांनी केले. कार्यक्रमास गावातील मान्यवर, ग्रामस्थ शिक्षक वृंद आणि विद्यार्थी बहुसंख्येने उपस्थित होते. सर्वांकडूनच या स्तुत्य उपक्रमाचे कौतुक होत आहे.

स्व.राजाराम डाकवे (तात्या) साहित्य पुरस्कारासाठी प्रस्ताव पाठवण्याचे आवाहन

स्व.राजाराम डाकवे (तात्या) साहित्य पुरस्कारासाठी प्रस्ताव पाठवण्याचे आवाहन

तळमावले/वार्ताहर

पाटण तालुक्यातील डाकेवाडी (काळगांव) येथील स्पंदन चॅरिटेबल ट्रस्टच्यावतीने दर्जेदार सहित्य कलाकृतींना राज्यस्तरीय स्व.राजाराम डाकवे (तात्या) साहित्य पुरस्कार दिला जाणार आहे. सन्मानचिन्ह, सन्मानपत्र, ग्रंथ आणि शाल असे या पुरस्काराचे स्वरुप आहे.

सन 2021 व 2022 या कालावधीत प्रकाशित झालेल्या साहित्य कलाकृती यासाठी ग्राह्य धरल्या जाणार आहेत. यामध्ये कथासंग्रह, कवितासंग्रह, चारोळीसंग्रह, कादंबरी, समीक्षा, वैचारिक लेखन, चरित्र आत्मचरित्र व संकीर्ण विभागातील साहित्य कलाकृतींचा यामध्ये समावेश केला जाईल. साहित्य पुरस्कार निवडीसाठी स्वतंत्र परीक्षक समिती नेमली आहे.

विजेत्या कवी, लेखकाला राज्यस्तरीय स्व.राजाराम डाकवे (तात्या) साहित्य पुरस्कार देण्यात येईल. पुरस्कारासाठी प्रस्तावासोबत आपल्या साहित्य कलाकृतीच्या तीन प्रती, दोन आयडेंटी फोटो, अल्प परिचय पाठवावा. पाठवलेल्या पुस्तकावर कोणत्याही प्रकारचा मजूकर लिहू नये. .

ट्रस्टच्यावतीने यापूर्वी साहित्यिकांना प्रोत्साहन देण्यासाठी उत्कृष्ट दिवाळी अंक स्पर्धा, वार्तांकन स्पर्धा आयोजित केल्या होत्या.

तरी सदर पुरस्कारासाठी आपले प्रस्ताव बुधवार दि.31 मे, 2023 पर्यंत ‘राजनंदा प्राईड अपार्टमेंट’, फ्लॅट नं.8, होली फॅमिली काॅन्व्हेंट स्कुलच्या पाठीमागे, सैदापूर विद्यानगर, ता.कराड, जि.सातारा. 415124 येथे पोस्टाने अथवा कुरियरने आपल्या साहित्य कलाकृती पाठवाव्यात असे आवाहन स्पंदन चॅरिटेबल ट्रस्ट चे संस्थापक/अध्यक्ष डॉ. संदीप डाकवे यांनी केले आहे.

विद्यार्थ्यांनी आपले ध्येय निश्चित करावे - ह. भ. प. सुभाष महाराज घाडगे

विद्यार्थ्यांनी आपले ध्येय निश्चित करावे  - ह. भ. प. सुभाष महाराज घाडगे

तळमावले/वार्ताहर

विद्यार्थ्यांनी आपले ध्येय निश्चित करून वाटचाल करावी असे प्रतिपादन ह. भ. प. सुभाष महाराज घाडगे यांनी केले ते महंत आबानंदगिरी चारिटेबल ट्रस्ट संचलित महायोगी गगनगिरी माध्यमिक विद्यालयात आयोजित केलेल्या वार्षिक पारितोषिक वितरण समारंभात प्रमुख पाहुणे म्हणून बोलत होते. यावेळी व्यासपीठावर संस्थेचे श्रद्धास्थान महामंडलेश्वर स्वामी आबानंदगिरीजी महाराज, केंद्रप्रमुख अरविंद दळवी, डॉ. संदीप डाकवे, निशा लोहार, लक्ष्मण पवार, सोनाली पवार, सुनील धुमाळ, शंकरभाऊ पवार, सारिका गुठाळे, ट्रस्ट चे संस्थापक राजेंद्र पांचाळ, वसतिगृहाच्या अधीक्षक कविता पांचाळ आणि अन्य मान्यवर उपस्थित होते. यावेळी कविता पांचाळ, केंदप्रमुख अरविंद दळवी, निशा लोहार, डॉ. संदीप डाकवे यांनी आपली मनोगते व्यक्त केली.

यावेळी बोलताना आबानंदगिरीजी महाराज म्हणाले, आजचा हा कार्यक्रम विद्यार्थ्यांना प्रेरणा देणारा आहे. ज्या विद्यार्थ्यांना बक्षीसे मिळाली आहेत त्यांचे अभिनंदन आणि ज्यांना मिळाली नाहीत त्यांनी निराश न होता पुढच्या वर्षी हे बक्षीस मला कसे मिळेल अशा विचाराने तयारीला लागले पाहिजे. 

दरम्यान, वर्षभरात विविध स्पर्धेत यशस्वी झालेल्या विद्यार्थ्यांचा प्रमाणपत्र, सन्मान चिन्ह देऊन मान्यवरांच्या हस्ते सत्कार करण्यात आला. प्रारंभी, दीपप्रज्वन आणि प्रतिमापूजनाने कार्यक्रमाची सुरुवात झाली. मुलींनी स्वागत गीत सादर केले. पसायदानाने कार्यक्रमांची सांगता झाली. कार्यक्रमाचे प्रास्ताविक शाळेचे मुख्याध्यापक जयवंत तरडे यांनी केले. सूत्रसंचालन आणि आभार प्रदर्शन कांबळे सर यांनी केले. कार्यक्रम यशस्वी करण्यासाठी गवळी मॅडम, जितेंद्र पिसाळ, महाले सर, सुरवसे सर, कर्मचारी संदीप भिसे, सदाशिव गुठाळे यांनी विशेष परिश्रम केले.

कै.आनंदा बाबुराव मोहिते यांच्या तृतीय पुण्यस्मरणानिमित्त कीर्तनाचे आयोजन

कै.आनंदा बाबुराव मोहिते यांच्या तृतीय पुण्यस्मरणानिमित्त कीर्तनाचे आयोजन

तळमावले/वार्ताहर

पाटण तालुक्यातील पाटीलवाडी (कुंभारगाव) येथील आनंदा बाबुराव मोहिते यांचे तृतीय पुण्यस्मरण बुधवार दि.11 जानेवारी, 2023 रोजी येत आहे. त्यास्मृतीप्रित्यर्थ बुधवार दि.11 जानेवारी, 2023 रोजी सायंकाळी 6 ते 9 या वेळेत शिरोली बु.ता.जुन्नर जि.पुणे येथील सुप्रसिध्द कीर्तनकार ह.भ.प.डाॅ.गजानन महाराज काळे यांच्या कीर्तनाचे आयोजन केले असल्याची माहिती मोहितेे परिवाराने दिली आहे. यासाठी ह.भ.प.धर्माचार्य अॅड.शंकर महाराज शेवाळे यांचे विशेष सहकार्य लाभले आहे.

गजानन महाराज यांनी कुलस्वामी खंडेराय चरित्र कथा या प्रबंधासाठी डाॅक्टरेट मिळाली आहे. कार्तीकी एकादशीनिमित्त सहयाद्री वाहिनीवर, जगदगुरु तुकाराम महाराज यांच्या अभंगावर 'झी टाॅकीज' या वाहिनीवर ह.भ.प.गजानन महाराज यांनी अनेक कीर्तने केली आहे. तर श्री कुलस्वामी खंडेराय यांच्यावर आठ दिवस झी टाॅकीज वर चरित्र कथा सांगितल्या आहेत. वरची पाटीलवाडी (कुंभारगांव) ता.पाटण, जि.सातारा येथे  आयोजित केलेल्या कीर्तन सोहळ्यास जास्तीत जास्त भाविकांनी उपस्थित राहून कीर्तनाचा लाभ घ्यावा असे आवाहन उज्ज्वला मोहिते, गिरीष मोहिते, मैत्री प्रतिष्ठान कुर्ला चे अध्यक्ष, भारतीय कामगार सेनेचे उपशाखाप्रमुख सुनील मोहिते आणि समस्त मोहिते परिवार व सर्व ग्रामस्थ पाटीलवाडी कुंभारगांव यांनी केले आहे.

दैनिके आणि वृत्तवाहिनींच्या नावांमध्ये साकारली दर्पणकारांची कलाकृती

दैनिके आणि वृत्तवाहिनींच्या नावांमध्ये साकारली दर्पणकारांची कलाकृती

तळमावले/वार्ताहर

आचार्य बाळशास्त्री जांभेकर हे मराठी भाषेतील आद्य पत्रकार होत. त्यांचा जन्म 6 जानेवारी 1812 रोजी पोंभुर्ले या गावी झाला. त्यांनी दर्पण हे मराठीतील पहिले वृत्तपत्र 6 जानेवारी, 1832 रोजी सुरु केले. त्यामुळे 6 जानेवारी हा दिवस पत्रकार दिन म्हणून साजरा केला जातो. महाराष्ट्र राज्य शासनाचे उत्कृष्ट पत्रकारितेसाठी 4 पुरस्कार पटकावलेले पत्रकार डाॅ.संदीप डाकवे हे कलेच्या माध्यमातून दर्पणकारांना प्रतिवर्षी अनोखे अभिवादन करतात. यावर्षी त्यांनी दैनिके आणि वृत्तवाहिनींच्या नावांमध्ये अप्रतिम चित्र रेखाटत जांभेकरांना अभिवादन केले आहे.

महात्मा गांधी तंटामुक्त अभियान, व्यसनमुक्ती, जटानिर्मुलन, लेक वाचवा, स्वच्छ भारत अभियान, बचत गट अशा प्रकारच्या विषयातून जनजागृती व समाजप्रबोधन करण्यासाठी संदीपने आपली लेखणी समर्थपणे चालवली आहे. पत्रकार दिन व आचार्य बाळशास्त्री जांभेकर यांच्या जयंतीच्या अनुषंगाने पत्रकार डाॅ.संदीप डाकवे यांनी रेखाटलेले चित्र परिसरात कौतुकाचा विषय ठरले आहे. एका पत्रकाराकडून दर्पणकारांना दिलेली ही अनोखी आदरांजलीच म्हणावी लागेल.

डाॅ.संदीप डाकवे यांच्या कलेची दखल ‘इंडिया बुक ऑफ रेकाॅर्ड’ ने तीनदा, वल्र्ड ग्रेटेस्ट रेकाॅर्ड मध्ये दोनदा, तर द ग्रेट इंडियन रेकाॅर्ड आणि हायरेेंज वल्र्ड बुक ऑफ रेकाॅर्ड ने एकदा घेतली आहे. डाॅ.डाकवे यांच्या अभूतपूर्व कामगिरीमुळे डाकेवाडीच्या शिरपेचात मानाचा तुरा खोवला आहे.

रांगोळी, पोट्रेट पेंटींग, वाॅल पेंटींग, व्यंगचित्रे, पेपर कटींग आर्ट, अक्षरगणेशा अशा चित्रकलेच्या विविध माध्यमात काम करत असताना डाॅ.संदीप डाकवे यांनी शब्दातून चित्रे ही कला आत्मसात केली आहे. त्या माध्यमातून ते पोट्रेट साकारण्याचा प्रयत्न करत आहेत.

डाॅ.डाकवे यांनी आतापर्यंत राजकीय, सामाजिक, शैक्षणिक, सेलिब्रिटी इ.क्षेत्रातील सुमारे 14 हजार पेक्षा जास्त मान्यवरांना चित्रे तयार करुन त्यांना भेट दिली आहेत. सातत्याने वेगळेपण जपत समाजप्रबोधन, जनजागृती यासाठी संदीप यांनी आपल्या कलेचा उपयोग केला आहे. विविध मंडळे, सामाजिक संस्थांनी डाॅ.डाकवे यांना ‘दर्पण’, ‘पत्रकार भूषण’, ‘पत्रकार रत्न’,‘कलारत्न’, ‘कलाविभूषण’, ‘कलागौरव’, ‘पाटण भूशण’ अशा सुमारे 60 पेक्षा जास्त पुरस्कारांनी गौरवले आहे

चौकटीत : प्रतिवर्षी जाभेंकरांना अनोखे अभिवादन :

डाॅ.संदीप डाकवे यांनी यापूर्वी स्क्रिबलिंग, पेपर कटींग आर्ट, शब्द-लेखणीव्दारे, पोस्टर रेखाटून, रांगोळी इ.माध्यमातून आचार्य बाळशास्त्री जांभेकर यांची सुंदर चित्रे रेखाटून त्यांना आदरांजली वाहिली आहे.

पाटण येथे राष्ट्रवादीचा भव्य सत्कार सोहळा राष्ट्रवादीचे प्रदेशाध्यक्ष जयंत पाटील यांची प्रमुख उपस्थिती

पाटण येथे राष्ट्रवादीचा भव्य सत्कार सोहळा

राष्ट्रवादीचे प्रदेशाध्यक्ष जयंत पाटील यांची प्रमुख उपस्थिती

पाटण प्रतिनिधी: नुकत्याच झालेल्या ग्रामपंचायत निवडणुकीमध्ये विजयी झालेल्या लोकनियुक्त सरपंच, सदस्य व विविध सहकारी संस्थांचे नवनिर्वाचित चेअरमन, व्हॉ. चेअरमन, संचालक यांचा भव्य सत्कार सोहळा राष्ट्रवादी काँग्रेस पक्षाचे प्रदेशाध्यक्ष मा.श्री.जयंत पाटील यांच्या हस्ते होणार आहे. हा कार्यक्रम पाटण विधानसभा मतदारसंघाचे नेते माजी मंत्री विक्रमसिंहजी पाटणकर, खा.श्रीनिवास पाटील, सत्यजितसिंह पाटणकर (संचालक, सातारा जिल्हा मध्य. सह. बॅक) यांच्या प्रमुख उपस्थितीत दि. ६ जानेवारी २०२३ रोजी  ऋचा हॉल, काळोली (कराड-चिपळूण रोड) येथे ठिक दु. १२:३० वा.  संपन्न होणार आहे, अशी माहिती पाटण विधानसभा मतदारसंघाचे राष्ट्रवादीचे अध्यक्ष राजाभाऊ शेलार यांनी आज प्रसिद्धी पत्रकाद्वारे दिली.

               यावेळी बोलताना शेलार म्हणाले, या सत्कार सोहळ्यामध्ये आम्हीं ग्रामपंचायत निवडणुकीमध्ये पराभूत झालेल्या लोकनियुक्त सरपंच पदाच्या व सदस्य पदाच्या उमेदवारांचेही सत्कार करणार आहे. हे उमेदवार जरी पराभूत झाले असले तरीही त्यांनी एका प्रचंड धनशक्ती विरुद्ध लढा देऊन तळागाळात राष्ट्रवादी काँग्रेस पक्ष जिवंत ठेवण्याचे काम केले आहे. राजकारणात हार-जित होत असते. देशाचे नेते व राष्ट्रवादी काँग्रेस पक्षाचे सर्वेसर्वा आदरणीय शरदचंद्रजी पवार साहेब व आदरणीय माजी मंत्री विक्रमसिंहजी पाटणकर (दादा) यांची शिकवण आहे, प्रत्येक कार्यकर्त्याला बळ दिले तरच पक्ष‌ वाढतो. त्यांच्याच पावलावर पाऊल ठेवून काम करणाऱ्या सातारा जिल्हा मध्य.सह.बॅंकेचे संचालक सत्यजितसिंह पाटणकर यांच्या संकल्पनेतून या सत्कार सोहळ्याचे आयोजन करण्यात येणार आहे असे ते म्हणाले. या समारंभास राष्ट्रवादी काँग्रेस पक्षाचे प्रदेशाध्यक्ष श्री.जयंत पाटील, माजी मंत्री विक्रमसिंहजी पाटणकर व खा.श्रीनिवास पाटील उपस्थितांना मार्गदर्शन करणार आहेत.

      या सत्कार सोहळ्यास सर्व संस्थांचे आजी-माजी चेअरमन, व्हा.चेअरमन, संचालक,आजी-माजी जि.प./ पं.स.सदस्य, सरपंच,उपसरपंच, ग्रामपंचायत सदस्य,राष्ट्रवादी काँग्रेस पक्षाच्या सर्व सेलचे पदाधिकारी, नगरपंचायतचे नगराध्यक्ष, उपनगराध्यक्ष, नगरसेवक व कार्यकर्त्यांनी बहुसंख्येने उपस्थित राहावे असे आवाहन शेलार यांनी यावेळी केले.