तळमावले/प्रतिनिधी :
माणसाच्या आयुष्यातील ७५ वे वर्ष म्हणजेच अमृतमहोत्सव हा कौटुंबिक आनंदाचा सोहळा असतो. या आनंदाला सामाजिक कृतज्ञतेची जोड देत मान्याचीवाडी ( कुंभारगाव ) येथील माने परिवाराने समाजासमोर एक नवा आदर्श ठेवला आहे. विष्णु कृष्णा माने यांच्या अमृतमहोत्सवी वाढदिवसाचे औचित्य साधून, महाराष्ट्र शासनाचा 'राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार' मिळाल्याबद्दल पत्रकार संदीप डाकवे यांचा माने परिवाराच्या वतीने जाहीर सत्कार करण्यात आला.
विष्णु कृष्णा माने यांनी आपल्या आयुष्याची ७५ यशस्वी वर्षे पूर्ण केल्याबद्दल माने परिवाराने एका भव्य आणि कौटुंबिक सोहळ्याचे आयोजन केले होते. या सोहळ्यात कला, साहित्य आणि पत्रकारितेच्या माध्यमातून समाजासाठी अखंडपणे झटणाऱ्या संदीप डाकवे यांच्या कार्याचा गौरव करण्यात आला. माने परिवारातील ज्येष्ठ सदस्य आणि उपस्थित मान्यवरांच्या हस्ते डॉ. डाकवे यांना शाल व श्रीफळ देऊन सन्मानित करण्यात आले.
या कौटुंबिक सोहळ्याला सामाजिक चळवळीची जोड दिल्याबद्दल परिसरामध्ये माने परिवाराचे कौतुक होत आहे. याप्रसंगी विष्णू माने, जिजाबाई माने, शरद माने, रेश्मा माने, प्रदीप माने व जयश्री माने यांच्यासह मान्याचीवाडीतील ग्रामस्थ, नातेवाईक आणि विविध क्षेत्रातील हितचिंतक मोठ्या संख्येने उपस्थित होते.
कृतज्ञतेने भारावलो : संदीप डाकवे
सत्काराला उत्तर देताना संदीप डाकवे भावुक झाले. ते म्हणाले, "विष्णु माने यांच्या अमृतमहोत्सवासारख्या अत्यंत पवित्र आणि कौटुंबिक सोहळ्यात माने परिवाराने माझ्या कार्याची दखल घेतली, हा माझ्यासाठी खूप मोलाचा क्षण आहे. या आपुलकीच्या सन्मानामुळे समाजात आणखी जोमाने कार्य करण्याची मोठी ऊर्जा मला मिळाली आहे."
कोणत्याही टिप्पण्या नाहीत:
टिप्पणी पोस्ट करा