कराड : प्रतिनिधी
सातारा जिल्ह्यात मंजूर झालेल्या शासकीय महाविद्यालयासाठी केंद्रीय स्तरावरील आवश्यक असणारी अंतिम परवानगी अखेर मिळाली असल्याने इच्छुक विद्यार्थ्यांच्या यावर्षीच्या प्रवेश प्रक्रियेचा मार्ग मोकळा झाला आहे. खा.श्रीनिवास पाटील यांनी केंद्रीय आरोग्यमंत्री मनसुख मांडवीय यांची भेट घेऊन केलेल्या मागणीनुसार या कार्यवाहीस गती प्राप्त झाली होती. आता अंतिम परवानगी जाहिर झाल्याने सातारा मेडिकल कॉलेज सुरू करण्यास हिरवा कंदील मिळाला आहे.
सातारा जिल्ह्यात मंजूर झालेल्या शासकिय महाविद्यालयात प्रवेश प्रक्रिया सुरू करण्यासाठी तयार असलेल्या पर्यायी ठिकाणी सर्व पायाभूत सुविधा राज्य शासनाने उपलब्ध करून दिल्या आहेत. मात्र राष्ट्रीय आयुर्विज्ञान आयोगाच्या पाहणी दौऱ्या अभावी ही प्रवेश प्रक्रिया प्रलंबित राहिली होती. त्यामुळे सदर ठिकाणची पाहणी करून त्यासाठी आवश्यक असणारी अंतिम परवानगी तातडीने द्यावी अशी आग्रही मागणी खा.श्रीनिवास पाटील यांनी केंद्रीय आरोग्यमंत्री मनसुख मांडवीय यांच्याकडे प्रत्यक्ष भेटीत केली होती. लोकसभेच्या पावसाळी अधिवेशना दरम्यान त्यांनी ही महत्वपूर्ण भेट घेतली होती.
सातारा मेडिकल कॉलेजसाठी महाराष्ट्र शासनाने मंजुरी दिली असून त्यासाठी 495 कोटीचा भरून निधी व 62 कर जमीन उपलब्ध करून देण्यात आली आहे. कॉलेजसाठी मंजूर असलेल्या जागेवर इमारत बांधली जाणार असून त्यासाठीची प्रक्रिया सुरू आहे. परंतू तोपर्यंत कॉलेजची प्रवेश प्रक्रिया रखडू नये, विद्यार्थ्यांचे शैक्षणिक वर्ष वाया जाऊ नये व कॉलेज प्रत्यक्ष सुरू व्हावे याकरिता तात्पुरत्या स्वरूपात सातारा येथे तयार असलेल्या पर्यायी इमारतीत कॉलेज सुरू करण्याचा निर्णय घेतला गेला आहे. त्याबद्दल शैक्षणिकदृष्ट्या लागणाऱ्या सर्व पायाभूत सोयीसुविधा राज्य शासनाने उपलब्ध करून दिल्या आहेत. मात्र तरीही राष्ट्रीय आयुर्विज्ञान आयोगाच्या पहाणी अभावी येथील प्रवेश प्रक्रिया प्रलंबित राहिली होती. याची दखल घेत खा.श्रीनिवास पाटील यांनी मंत्री मनसुख मांडवीय यांची भेट घेऊन हा पाहणी दौरा आयोजित करून अंतिम परवानगी तातडीने द्यावी अशी मागणी केली होती. त्यानंतर लगेचच आयुर्विज्ञान आयोगाच्या पथकाने दि. 12 ऑगस्ट रोजी सातारा येथे भेट देऊन ही पहाणी केली होती. तात्पुरत्या स्वरूपात केलेल्या व्यवस्थेसह अन्य बाबींची त्यांनी सविस्तर पहाणी केली होती. त्यानुसार सन 2021-22 या शैक्षणिक वर्षासाठी 100 विद्यार्थ्यांच्या पहिल्या सत्रासाठी अनुमती दिली आहे. त्यामुळे सातारा मेडिकल कॉलेजचा समावेश हा नुकत्याच राबविलेल्या नीट परिक्षेतून होणा-या त्यांच्या अंतर्गत प्रवेश प्रक्रियेत समावेश होण्याची शक्यता आहे. ही अंतिम परवानगी मिळाल्याने मेडिकल कॉलेजची पहिली बॅच सुरू होण्याचा मार्ग आता मोकळा झाला आहे. यासंदर्भात खा.श्रीनिवास पाटील यांनी तातडीने पाठपुरावा करून वेळेत केलेल्या प्रयत्नांना अखेर यश आले आहे. अन्यथा पहाणी दौ-या अभावी अद्याप इच्छुक विद्यार्थ्यांचे एक वर्ष वाया जाण्याची भिती व्यक्त केली जात होती.
दरम्यान केंद्रीय आरोग्यमंत्री मनसुख मांडवीय यांच्याकडे पाठपुरावा केल्याने व त्यांनी देखील याची तात्काळ दखल घेऊन पथक पाठवल्यामुळे यास गती मिळाली आहे. याबद्दल मंत्री मनसुख मांडवीय यांचे खा.श्रीनिवास पाटील यांनी जिल्हावांसियांतर्फे आभार मानले आहेत.
कोणत्याही टिप्पण्‍या नाहीत:
टिप्पणी पोस्ट करा